Towel Day

Us der alemannische Wikipedia, der freie Dialäkt-Enzyklopedy

De Towel Day (alem. Handtuech-Tag) isch en Gedenktag zur Ehr vom britische Autor Douglas Adams, wo am 11. Mai 2001 gstorbe isch. De Towel Day findet sither jedes Jahr am 25. Mai statt.

Handtuech–Flagge z Innsbruck am Towel Day 2005

A dem Tag träged d Fans es Handtuech mit sich ume, das isch en Remineszänz as Buech Per Anhalter durch die Galaxis, wo Handtüecher vom Autor drin als ungemein praktischi Sache beschribe werded und so zimlich s Nützlichschte sind, was mer uf Reise durs Universum debi chan ha.

Ursprung vum Zitat[ändere | Quälltäxt bearbeite]

S'Originalzitat, wo sich uf d'Grossartigkeit vu Handtüecher beziegt, findet sich im 3. Kapitel vu im Adams sinem Buech The Hitchhiker's Guide to the Galaxy (dt. Per Anhalter durch die Galaxis).

In sällem ultimative Reisefüehrer un Wikipedia-Vorbild stoht zum Lemma 'Handtuech' (do in dr alemannische Ibersetzig vom englische Original):

„E Handtuech isch, wie gsait, eini vu dr allernützlichschte Sache, wo mer as e Ahalter uf Reise zwische dr Sterne ha cha. Zum eine het es grosse praktische Wert: Mer chas zum Wärme um sich wickle, wemmer iber die chalte Mönd vu Jaglan Beta lauft. Mer cha druf liige, wemmer sich an dr wunderscheene Marmorsandstränd vum Santagrinus V. an dr Meeresdämpf berüscht. Mer cha drunter schlofe, zwische dr Sterne, wo so rot schine in dr Wüeschtewelt Kakrafoon. Benutz es as e Segel, wenn dü dr langsam, schwer Mothfluss abifahrsch. Machs nass, wenn dü es im e Nahchampf bruchsch. Wickels um di Chopf, um dich vor schädliche Dämpf z'schütze oder vorem Atem vum Gfrässige Dummschwätzchäfer vu Traal (e selte blöds Vich: S'meint, wenn du es nit sähe chasch, cha's di au nit sähe. Brunzdoof wie ab, aber sehr gfrässig). Du chasch in Notfälle mit em Handtuech winke, um uf dich ufmerksam z'mache, un natirlich, chasch dich demit abtrichne, wenn es immer noch sufer gnue defir isch.

Aber viil wichtiger: e Handtuech het e uschätzbare psychologische Wert. Zum eine, wenn e Strag (Strag: Nicht-Ahalter) bemerkt, dass e Ahalter e Handtuech debi het, wird er automatisch anämme, dass er au im Besitz vu Zahnbürschte, Wäschlumpe, Seipfe, Keksdose, Wasserflasche, Kompass, Landcharte, Bindfade, Schnoogespray, Rägechleidig, Rümazug etc. etc. isch. Drübernus wird dr Strag no glicklich eini vu sälle oder vu eme Dutzed andere Sache usleihe, wo dr Ahalter offebar versehetlich "verlore" het. Was dr Strag denke wird, isch, dass ebber, wo durch d'Galaxis in ihrer Längi un Breiti trämpe cha, in rauher Gegend, durch Schlamm, wo gege schrecklichi Gfahre chämpft, eiditig ebber isch, wo mer mit rächne muess.

Sällewäg git's drum Usdrück, wo es in dr Slang vu dr Ahalter gschafft hän, wie "He, sassisch dü sälle hopig Ford Prefect? Säller isch e Frud wo wirkli weiss, wo si Handtuech isch" (Sasse: wisse, chänne, sich bewusst si, treffe, Sex ha mit; Hopig: guet binander; Frud: ebber, wo wirkli erstaunlich guet binander isch)[1] [2]

Wahl vom Datum[ändere | Quälltäxt bearbeite]

25. Mai[ändere | Quälltäxt bearbeite]

Be der Uuswahl vom Tag hed keis historischs Datum en Rolle gspilt, vilmeh isches en Kompromiss gsi us em Wunsch, möglichscht bald nachem Tod de Gedenktag z begoh, un de Notwendigkeit, gnue Ziit z ha zum die Nachricht um de Globus zschicke. De 25. Mai hed sich uf das abe als Towel Day etabliert.

Anderi möglichi Termine[ändere | Quälltäxt bearbeite]

Anderi Termin, wonen Bedütig in Bezug uf de Douglas Adams hend sind de 11. Februar (de 42. Tag vom Joor), sin Geburtstag (11. März) oder sin Todestag (11. Mai). Die send für 2002 als noii Termin für de Towel Day diskutiert worde, aber ned akzeptiert.

Weblinks[ändere | Quälltäxt bearbeite]

 Commons: Towel Day – Sammlig vo Multimediadateie

Quelle[ändere | Quälltäxt bearbeite]

  1. übersetzt vu Archivierte Kopie. Archiviert vom Original am 20. Juni 2008; abgruefen am 18. Juni 2008. Offizielli Englischi Homepage
  2. Douglas Adams, The Hitchhiker's Guide to the Galaxy, Kap. 3
Dä Artikel basiert uff ere fräie Übersetzig vum Artikel „Towel_Day“ vu de dütsche Wikipedia. E Liste vu de Autore un Versione isch do z finde.