Sarangi

de Anant Kunte Sing bim Sarangispile

D Sarangi (Sārangī; Hindi: सारंगी; Persisch: ‏سرانگى ‎) isch e Striichinstument, wo im nördliche Indie, z Nepal und z Pakistan haimisch isch. Si isch ais vo de wichtigste Instrument i de klassische indische Musig, und zimli schweer zum guet spile. D Sarangi werd useme Holzblock gschnitzt und de Resonanzkörper werd denn mitere Tierhut öberzoge, wo de Steg dröberlauft. Vo de Sarangi werd gsait, as si em maiste a de menschliche Stimm gliichi.

As de best Sarangispiler vom 20. Joorhundert gelt de Ram Narayan us de indische Stadt Udaipur.