Rue de Rivoli

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Rue de Rivoli (rächts im Bild d Tuilerie)

D Strooss Rue de Rivoli befindet sich im 1. und im 4. Arrondissement vo Bariis und isch immer no äini vo de wichdigste stedtebaulige Aggse vo dr Stadt. Si het e Lengi vo öbbe drei Kilometer und goot vo Ost uf Weste vo dr Rue de Sévigné zur Place de la Concorde; die östligi Verlengerig vo dr Aggse, d Rue Saint-Antoine, goot zur Place de la Bastille. Die westligi Fortsetzig isch d Avenue Gabriel paralleel zur Avenue des Champs-Élysées.

D Strooss isch uf e Befääl vom Napoléon Bonaparte, wo denn dr Erst Konsul vo dr Franzöösische Republik gsi isch, mit Arkaade noch em baukünstlerische Vorbild vo dr Place des Vosges aagläit worde. Si isch Däil gsi vom Napoleon sine baanbrächende innebolitische Reforme und er het mit siine groossaagläite stedtebaulige Brojekt d Stadt Bariis nit nume vo Grund uf welle modärnisiere, sondern au welle verschöönere. Iire Naame het si vom italiänische Ort Rivoli bi Verona überchoo, wo die franzöösischi Revoluzioonsarmee under em Napoleon im Januar 1797 in dr Schlacht vo Rivoli d Östriicher entschäidend gschlaage het.

Am 9. Oktober 1802 isch dr Beschluss gfasst worde, d Strooss z baue. Dr Archidekt Charles Percier het d Entwürf drfür gmacht und no im Joor 1802 het mä afo baue. Zerst isch dr Stroosseabschnitt in dr Nööchi vom Louvre und westlig drvo baut worde. Dr östligi Stroosseabschnitt stammt us dr Zit vom Karl X., vom Ludwig Philipp und vom Napoléon III.

D Rue de Rivoli gältet as äini vo de bekanntiste Laadestroosse vo dr Stadt. In dr Nööchi vom Louvre befinde sich e Hufe Lääde mit Souvenir für Duriste.

Liddratuur[ändere | Quälltäxt bearbeite]

  • Chris Boicos u.a.: Paris. RV Reise- und Verkehrsverlag, Berlin 1994, ISBN 3-89480-901-9, S. 121–123, 130, 314.
  • Julia Droste-Hennings, Thorsten Droste: Paris. Eine Stadt und ihr Mythos. DuMont-Reiseverlag, Köln 2003, ISBN 3-7701-6090-8, S. 46.
  • Fritz Stahl: Paris. Eine Stadt als Kunstwerk. Rudolf Mosse Buchverlag, Berlin 1929.
  • Heinfried Wischermann: Architekturführer Paris. Gerd Hatje Verlag, Ostfildern 1997, ISBN 3-7757-0606-2, S. 30, 96, 120.

Weblingg[ändere | Quälltäxt bearbeite]

 Allmänd (Commons): Rue de Rivoli (Paris) – Sammlig vo witere Multimediadateie

48.8569166666672.3536722222222Koordinaten: 48° 51′ 25″ N, 2° 21′ 13″ O

Dä Artikel basiert uff ere fräie Übersetzig vum Artikel „Rue_de_Rivoli“ vu de dütsche Wikipedia.

E Liste vu de Autore un Versione isch do z finde.