Raumzeit

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D Ruumzit oder s Ruum-Zit-Kontinuum bezäichnet in dr Relatiwidäätstheorii d Veräinigung vo Ruum und Zit in ere äihäitlige vierdimensionale Struktur mit spezielle Äigeschafte (z. B. „Kausalidäät“). Die rüümlige und zitlige Koordinate chönne bi Dransformazioone in anderi Bezuugssüsteem mitenander vermischt wärden.

Historisch het mä Zit und Ort as separati Begriff verstande. Das goot bi Alldaagsgschwindigkäite, aber wenn d Gschwindikäite nooch zur Liechtgschwindikäit si, goot s nüme. Denn zäigt sich, ass Zit und Ort vom ene Eräignis sich immer gegesitig bedinge, unabhängig vom füsikalische Süsteem, wo mä studiert. Die Kopplig vom Ruum und vo dr Zit muess nume dr Forderig gnüege, ass, wenn s Eräignis A s Eräignis B bedingt, die „Kausalidäät“ in alle Koordinatesüsteem muess gälte. Wemm mä also vo äim Koordinatesüsteem zum en andere wäggslet, darf d Kausalidäät vo Eräigniss nit veränderet wärde.

D Kausalidäät wird mathematisch dur en Abstandsbegriff definiert, wo vo de drei differenzielle Ortskoordinate dx, dy, und dz vo de Eräigniss und iire differenzielle Zitpünkt dt abhängt.[1] D Forderig noch dr „Invarianz“, dr Erhaltig vo dr Kausalidäät, vom verallgemäinerete Abstand vo zwäi Ereigniss füert drzue, ass füsikalischi Modäll in mathematische Rüüm beschriibe wärde, wo in ene Zit und Ruum uf e bestimmti Art kopplet si.

Mä cha en absolut gültige Abstandsbegriff, wo gegenüber Koordinatewäggsel inwariant isch, für Ruumzitpünkt vom erwäänte vierdimensionale Ruum-Zit-Kontinuum (sogenannti „Eräigniss“) definiere[2], aber es hängt vom Beweegigszuestand vom Beobachter und dr Aawääsehäit vo Masse bzw. Energii (z. B. in Fälder) ab, was drvo as rüümlige und was as zitlige Abstand gmässe wird. Mathematisch wird d Ruumzit mit Hilf von ere pseudo-riemannsche Mannigfaltigkäit beschriibe, speziell im sogenannte Minkowski-Ruum. Zum Bischbil gältet in däm Ruum für es „Eräignis“ mit de vier Koordinate cdt, dx, dy, dz (wo c d Liechtgschwindigkäit isch), ass dr „verallgemäinereti Abstand“ ds, wo drzue ghöört, – oder gnauer si Kwadrat (ds)2 – nit wie üüblig dur e Pythagoras  (ds)2 = (cdt)2 + (dx)2 + (dy)2 + (dz)2 definiert isch, sondern dur e indefinit Usdruck  (ds)2 := (cdt)2 − (dx)2 − (dy)2 − (dz)2 (mä reedet von ere nit-driwiale „Signatur“ vom vierdimensionale Ruumzit-Kontinuum, öbbe so: (+,−,−,−)).[3]

Fuessnoote[ändere | Quälltäxt bearbeite]

  1. Uf d Differänz vo zwäi Eräigniss chunnt s aa; dorum het s überall s d.
  2. Gnauer: für d Differänz vo zwäi infinitesimal benachberete Eräigniss
  3. Es git au ekwiwalänti Konwenzioone vom Minkowski-Ruum, wo aber weniger gebrüüchlig si wie z. B. mit dr Signatur (−,+,+,+), oder (i,+,+,+), wobi i die imaginäri Äihäit vo de komplexe Zaale isch.

Litratuur[ändere | Quälltäxt bearbeite]

  • George F. Ellis, Ruth M. Williams: Flat and curved space-times. Oxford Univ. Press, Oxford 1992, ISBN 0-19-851164-7
  • Erwin Schrödinger: Space-time structure. Cambridge Univ. Press, Cambridge 1950, dütsch: Die Struktur der Raum-Zeit., Wiss. Buchges., Darmstadt 1993, ISBN 3-534-02282-3
  • Edwin F. Taylor, John Archibald Wheeler: Spacetime physics. Freeman, San Francisco 1966, ISBN 0-7167-0336-X, deutsch:Physik der Raumzeit. Spektrum Akad. Verl.,Heidelbärg 1994, ISBN 3-86025-123-6
  • Rainer Oloff: Geometrie der Raumzeit. Vieweg, Wiesbade 2008, ISBN 978-3-8348-0468-6

Filosofischi Büecher:

  • Robert DiSalle: Understanding space-time: the philosophical development of physics from Newton to Einstein. Cambridge Univ. Press, Cambridge 2007, ISBN 978-0-521-85790-1
  • Moritz Schlick: Raum und Zeit in der gegenwärtigen Physik. Springer, Berlin 1922, preview
  • Lawrence Sklar: Space, Time, and Spacetime, University of California Press 1977

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Raumzeit“ vu de dütsche Wikipedia.

E Liste vu de Autore un Versione isch do z finde.