Qin-Dynastie

D Qin-Dünastii

S Gebiet vo dr Qin-Dünastii um 210 v. d. Z..

Dr Qin Shihuangdi

D Qin-Dünastii (chin. 秦朝, Qín Cháo, W.-G. Ch’in Ch’ao) isch die ersti Dünastii vom chinesische Kaiserriich gsi und het vo 221 bis 207 v. d. Z. gherrscht.

Gschicht

D Qin-Dünastii isch im Staat Qin entstande. Das isch dr westligst vo de siibe Staate gsi, wo in dr Zit vo de kämpfende Riich um d Vorherrschaft grunge häi. De Qin isch s bis zum Joore 221 v. d. Z. glunge, alli andere Riich z eroobere und so zum erste Mol s ganze Territorium, wo Chinese gläbt häi under äinere Chroone z veräinige. Das isch dr Höhepunkt von ere Entwicklig gsi, wo scho in de Joorhundert vorhäär aagfange het und äins vo de wichdigste Eräigniss in dr Gschicht vo China isch. Noch dr Äinigung vom Riich het dr Qin-Köönig Zheng dr Kaiserditel aagnoo; er isch dorum as Qin Shihuangdi bekannt. As dr äigentlig Archidekt vom Äihäitsriich gältet aber si Kanzler Li Si. S Territorium, wo d Qin-Dünastii drüber gherrscht het, isch vil gröösser gsi as das, wo iiri Vorgänger, wie öbbe d Shang- oder Zhou-Dünastii kontrolliert häi.

D Qin-Dünastii het nime e baar Joor existiert, aber die ghööre zu de Abschnitt in dr chinesische Gschicht, wo politisch am kreativste gsi si. D Qin häi uf dr Filosofii vom Legalismus d Grundzüüg vom chinesische Staatswääse ufbaut, wo denn Joorhunderti lang bestande het: die kaiserligi Bürokratii, die süstematischi Erfassig vo dr Bevölkerig und de Ländereie zum sä chönne bestüüre, d Legitimierig vom Kaiserdum, dr Bau von ere Muure zum Schutz gege d Völker vo Innerasie und d Verwändig vo äihäitlige Määss, Schrift und Wäärig im ganze Riich. Nit zletscht chunnt dr Naame China vom Wort Qin.

Noch em Dood vom erste Kaiser im Joor 210 v. d. Z. si im ganze Land Unrueje usbroche. Drotz iirer milidäärische Sterki het dr Bürgerchrieg, wo usbroche isch, d Qin zum Fall brocht. Im Joor 207 v. d. Z. het dr Rebell Xiang Yu dr dritt Qin-Kaiser Ziying lo hiirichte, und churz nochääne het dr Liu Bang d Han-Dünastii gründet.

Historischi Bewärtig

Lang het die chinesischi Gschichtsschriibig d Qin-Dünastii as barbarisch und militarisdisch verurdäilt. Au under westlige Wüsseschaftler häi d Qin lang as e tüpischs Bischbil für e Totalitarismus gulte. D Analüüse vo archeologische Fund het aber in de letschte Joorzäänt s Bild usgwoogniger gmacht.

Litratuur

• Bodde, Derk: The state and empire of Ch'in, in: The Cambridge History of China, Band 1 The Ch'in and Han Empires, 221 B.C.-A.D.220, Cambridge 1986, ISBN 9780521243278.
• Lewis, Mark Edward: The Early Chinese Empires: Qin and Han, London 2007, ISBN 978-0-674-02477-9.
• Helwig Schmidt-Glintzer: Geschichte Chinas bis zur mongolischen Eroberung 250 v. Chr. – 1279 n. Chr. Oldenbourg, München 1999, ISBN 3-486-56402-1.
• Michael Strähle: Bücherverbrennungen und Zensur im alten China und ihre Folgen. in: Mitteilungen des Vereins Österreichischer Bibliothekare Wien 56.2003, ISSN 1022-2588, S. 41-42.
• Jacques Gernet: Die chinesische Welt. Suhrkamp, Frankfurt 1994, ISBN 3-518-38005-2.

Weblingg

 Allmänd (Commons): Qin-Dynastie – Album mit witere Multimediadateie

• Michael Strähle: Bücherverbrennungen und Zensur im alten China und ihre Folgen (PDF-Datei; 98 kB)
• Interaktivi Microsite über dr erst Kaiser vo China Qin Shi Huangdi
• Informatione zue Qin-Dynastie im BAM-Portal

Fuessnoote

Dä Artikel basiert uff ere fräie Übbersetzig vum Artikel „dütsch“ vu de.wikipedia.org. E Liste vu de Autore un Versione isch do z finde.

D Epoche vorhäär Zit vo de kämpfende Riich	Zitdaafele vo dr chinesische Gschicht	D Epoche noochhäär Han-Dünastii