Pippal-Baum

Us der alemannische Wikipedia, der freie Dialäkt-Enzyklopedy
Dialäkt: Ùndertòggeborg
Pippal-Fige

Ficus religiosa

Systematik
Euroside I
Ordnig: Rosenartigi (Rosales)
Familie: Muulbeerigwächs (Moraceae)
Gattig: Fyge (Ficus)
Untergattig: Urostigma
Art: Pippal-Fige
Wüsseschaftlige Name
Ficus religiosa
L.

De Pippal-Baum (Ficus religiosa; Pappel-Fiige, Bodhibaum, Buddhabaum; Pali: asattha) ghört zu de Familie vode Muulbeergwächs (Moraceae). Sini Haimet isch Indie und Ostasie. De Baum wachst ganz schnell und bildet Luftwurzle und chan öppe 30 Meter höch werde. I starche Trochezite chaner all sini Blätter abwörfe.

De Pippal-Bomm macht im Februar roti Blüete und im Mai chlini Frücht vomene Durchmesser vo öppe aim bis anderthalb Santimeter. Die vielette Frücht chamer esse, würket aber liecht abfüehrend. D Blätter chönet 18 cm lang werde und laufet inen arttypische lange Spitz us. Si sind liecht giftig und werdet zu Medizin för Hutchrankete verarbaitet. Au d Rinde werd för medizinischi Zweck brucht, bsunders för d Behandlig vo Entzündige und Gschwür.

De Pippal-Baum isch im Hinduismus, Jainismus und Buddhismus hailig und die tröchnete Blätter werdet mit Bilder vom Buddha oder hailige Objekt bemolt.

de Mahabodhi[ändere | Quälltäxt bearbeite]


De Baum isch im Buddhismus hailig, well de nordindisch Königssoo Siddhattha Gotama unter aim vo dene Bömm im indische Ort Bodhgaya d Erlüüchtig erlangt het und so zum Buddha worden isch. Z Bodhgaya schtoht hüt e Nochkome vo dem Bomm und werd Mahabodhi ("Grossi Erlüchtig") gnennt.

De indisch Kaiser Aschoka het um de alti Bomm e Staimuur errichte loo und het e Schösslig am König vo Sri Lanka gschickt, wo deseb zum Buddhismus übertrete isch. De Schösslig isch i de Kaiserstadt Anurādhapura ipflazt worde und werd hüt as Sri Mahabodhi verehrt und isch e beliebte Pilgerort vo Sri Lanka.

De alti Bomm z Bodhgaya isch im Afang vom 7. Johrhundert em Hass vom König Sasānka zum Opfer gfale. De heten nöd nu lo umhaue loo sondern gadono bifohle, ass d Wurzle verbrennt werde sölet. Spöter isch den e Schösslig vom Sri Mahabodhi us Sri Lanka uf Bodhgaya brocht worde. Well weret de Mogule-Zit die ganzi Tempelaalaag vernochlässigt worden isch, isch de zwaiti Bomm abgserblet und im Joor 1867 heten e Sturm entwurzlet. Öb de hütig Bomm vo sebem abstammt oder öb e noie Schösslig us Sri Lanka gholt worden isch, waiss mer nüm.

Web-Link[ändere | Quälltäxt bearbeite]