Numa Pompilius

Us der alemannische Wikipedia, der freie Dialäkt-Enzyklopedy
Hops zue: Navigation, Suech
e römischi Münze mitem Numa Pompilius am Altoor

De Numa Pompilius (752-682 v.Chr.) isch de zwait König vo Rom (715-672 v.Chr.) gsii. Er het di römischi Religioo reformiert und gelt als biispilhafte Sakralgsetzgeber. Er isch mit achtzgi gstorbe und isch ufem Ianiculus bigrabe wore.

Famili[ändere | Quälltäxt bearbeite]

De Numa Pompilius isch de Soo vomene Pompon gsii, emene Sabiner us Cures. Er het d Tatia, d Töchter vom König Titus Tatius, ghüroote und vonere e Töchter ghaa, d Pompilia, wo denn d Muetter vom König Ancus Marcius woren isch. Mengisch werd as Muetter vo de Pompilia au d Lucretia aggee, wo di dritt Frau vom Numa gsii isch.

Di zwait Frau isch d Nymphe Egeria gsii. Si het de Numa i d Gsetz vo de Religioo iigfüert und en mit erem tüüfe Wüsse biroote, woruf er di römischi Religio reformiert hett. Vo dere Verbindig söled di römische Famili vo de Pinarii, Calpurnii, Mamercii und Pomponii abstame.

Religiösi Ernoierige[ändere | Quälltäxt bearbeite]

Zu de Noierige ghört e Kalenderreform, wo d Täg i Fest- und Grichtstäg (fasti) und anderi (nefasti) iitailt het. Meriri Fest gönd uf de Numa Pompilius zrugg, under anderem au d Marsspiili und s Ritual vo de Argei.

Denn het er meriri Priesterämter iigfüert oder umorganisiert. Er het de Kult vo de Fides und em Terminus iigfüert und ene e Tempel baut. Au för d Vesta het er Tempel baue loo und zodem de Janusboge.