Mohammed

Us der alemannische Wikipedia, der freie Dialäkt-Enzyklopedy

Dr Mohammed (arabisch Muhammad محمد‎ [muˈħamːad] ), öbbe 570-632 noch dr Ziitwändi, isch dr Stifter vom Islam gsi.

[ändere] Biografii

D Geburt vom Mohammed; vom Raschid ad-Din, Dschami' al-Tawarich, Täbris, Iran, öbbe 1315

Es git braktisch keini hischdorische Quelle über s Läbe vom Mohammed. S maischd was mä weiss schdammt uus schböötere Schrifte.

Dr Mohammed isch öbbe im Johr 570 z Mekka in Arabie uf d Wält cho–noch dr Sunnitische Dradition am 25. April 571, noch dr schiitische fümf Dag schböter. Er het zum Schdamm vo de Kuraisch ghört, wo groosses Aasehe gnosse het. Si Vadder isch scho vor siiner Geburt gschdorbe und si Muetter won er sächsi gsii isch. Er isch denn vo siiner Groossfamilie erzoge worde. Im Alter vo öbbe 25 het er d Witwe Chadidscha (öbbe 555-619), wo zum gliiche Schdamm ghört het und sehr vermögend gsi isch, ghürotet und het as Kaufma z Mekka in guete Verhältnis gläbt. Uf siine Handelsreise isch er vil in Kontakt mit Jude, Chrischde und Ahänger vo andere Religione cho und het sich mit Broblem vo dr Sünd und em göttlige Gricht und andere Froge afo beschäftige. Im Johr 606 isch si jüngschti Dochder, d Fatima, uf d Wält cho. Vo öbbe 610 a het er gwüsst, ass är ä Prophet siig und het a de Lüt z Mekka siini Offebahrige afo verzelle. Die hai siini Lehre aber abglähnt. Wil er vo de polytheischdische Mekkaner wäge siine Lehre agriffe worden isch, isch er im Johr 622 nach Medina zoge, es Ereignis wo siit dr Regierig vom Chalif Omar as dr Afang vo dr islamische Ziiträchnig gültet. Dört het dr Mohammed Ahänger gfunde und isch denn zrugg uf Mekka, won er noch mehrere Aläuf im Johr 630 doch no het chönne zu siiner Lehr bekehre. Bis zu siim Dod het er ä groosee Deil vo Arabie zum Islam bekehrt und mit de Jude dr Verdrag vo Mekka abgschlosse, wo d Jude as Deil vo dr Umma, dr Gmeinschaft vo de Gläubige, anerkennt. Er isch 8. Juni 632 gschdorbe.

[ändere] Quelle

Vorlage:Dtv-Lexikon, Band 12, S. 246; Band 6, S.71; Band 8, S.229