Mittelfränkisch

Dialäkt: Undermarkgreflerisch

Rhynische Fächer, s Mittelfränkisch entspricht dr Nr. 3, 4 un 5

Mittelfränkisch haißt me ne Gruppe vu weschtmitteldytsche Dialäkt. Si wäre vor allem in eme Biet zwische Lothringe un Nordryy-Weschtfale gschwätzt. Zue dr mittelfränkische Dialäkt zellt mer di ripuarische Dialäkt un di moselfränkische Dialäkt, wu au s Lothringisch un Luxeburgisch derzue ghere.

Mittelfränkisch het nyt z due mit em bayerische Bezirk bzw. Regierigsbezirk Mittelfranke, wu mer oschtfränkischi Dialäkt schwätzt.

Abgränzig

Vu dr niderdytsche Dialäkt im Norde wird Mittelfränkisch dur d Benrather Linie („maken/machen-Linie“) abgränzt.

Vu dr ryyfränkische Dialäkt im Side wäre di mittelfränkische Dialäkt dur d Sankt Goarer Linie oder Hunsrück-Schranke („dat/das-Linie“), wu vu Völklingen an dr Saar iber Simmern, Sankt Goar un Limburg bis uf Dillenburg goht, un dur d Bopparder Linie („Korf/Korb-Linie“) abgränzt.

Gliderig

Di Ripuarische Dialäkt im Norde un s Moselfränkisch im Side wäre dur d Bad Honnefer Linie oder Eifel-Schranke („Dorp/Dorf-Linie“) abgränzt, wu bi Bad Honnef iber dr Ryy goot.

Forschig

Dr Wortschatz vum Mittelfränkisch wird im Ryynische Werterbuech un im Luxeburger Werterbuech bschribe, d Sprochgeografi im Mittelryynische Sprochatlas un im Luxeburgische Sprochatlas.

Literatur

• dtv-Atlas zur deutschen Sprache, 13. durchgesehene Auflage, München 2001