Guido da Polenta

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Guido Da Polenta, au Guido dr Elter († 1310) isch e Politiker in dr italiänische Stadt Ravenna in dr Romagna gsi.

Läbe[ändere | Quälltäxt bearbeite]

Dr Guido Da Polenta isch dr Afüehrer vo de Guelfe, dr pro-päpstlige Partei, z Ravenna gsi. Er het sich öbbe 1275 mit dr Malatesta Familie vo Rimini verbündet und het im Gianciotto Malatesta si Dochder Francesca zur Frau ge. Im Johr 1275 het er d Ghibelline us dr Stadt verdriibe. 1278 isch d Romagna under die diräkti Kontrolle vom Papst cho. Dr Guido het si Macht usbaut und het sich noch 1285 gege die päpstlige Machtasprüch afo wehre. Er isch 1286 zum podestà (Stadtoberhaupt) vo Ravenna gwehlt worde und isch vier Johr im Amt gsi.

In 1290, wo dr Guido z Floränz gsi isch as podestà, isch dr päpstlig Beamti, dr Stefano Colonna, z Ravenna acho und het dört welle d Macht übernäh. Im Guido siini Söhn, dr Lamberto und dr Bernardino, hai en gfangegnoh und a Revolte gege dr Papst in dr Romagna azettlet.

1292 isch er no einisch z Ravenna für e Johr zum podestà gwehlt worde. In siiner Amtsziit het er d Fiind vo dr Kommune vo Usse abgwehrt und im Innere siini politische Gegner underdruggt.

Dr Guido da Polenta isch im Johr 1297 gstorbe. Si Sohn Lamberto isch si Nochfolger z Ravenna worde, dr Bernardino z Cervia.[1]

Dr Guido Novello da Polenta, dr Herrscher vo Ravenna, wo dr Dante in dr Stadt ufgnoh het, isch si Änkel gsi.

Quelle[ändere | Quälltäxt bearbeite]

  • Dr Ardikel "Polenta Family." in dr Encyclopædia Britannica. Ultimate Reference Suite. Chicago: Encyclopædia Britannica, 2009.

Fuessnote[ändere | Quälltäxt bearbeite]

  1. Dr Ardikel Guido I da Polenta uf dr änglische Wikipedia