Generalrat (Frankreich)
Us der alemannische Wikipedia, der freie Dialäkt-Enzyklopedy
Dr Generalroot (französisch conseil général, dütsch öbbe „allgemeine Root“) isch s oberste gwehlte Kollegialorgan vom ene französische Département.
D Mitgliider vom Generalroot, d Generalrööt (französisch conseillers généraux), wärde in diräkter Wahl für sächs Johr gwehlt. Drbii wird alli drei Johr d Helfti vo de Mitgliider neu gwehlt. As Wahlbezirk diene drbii d Kantön, dorum sait mä dene Wahle Kantonalwahle (französisch élections cantonales).
Dur d Dezentralisierigsgsetz vo 1982 isch d Stellig vom Generalroot em Präfekt gegenüber, wo vo dr Regierig ernennt wird, gsterkt worde. D Exekutive vom Département wird sithär vom Presidänt vom Generalroot (französisch président du conseil général) gleitet, wo vom Generalroot gwehlt wird.
