Die Simpsons

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Seriedate
Logo The Simpsons.svg
Dütsche Titel: Die Simpsons
Originaltitel: The Simpsons
Produktionsland: USA
Südkorea (Animation)
Produktionsjohr: syt 1989 (1987)
Längi von erä Folg: öbbe 22 Minute
Zahl vo de Folge: 532+ in 25 Staffle
Originalsproch: Englisch (AE)
Musik: Alf Clausen, Richard Gibbs
Titellied: Danny Elfman
Idee: Matt Groening
Genre: Comedy, Satire
Erstusstrahlig: 17. Dezämber 1989 (USA)
auf FOX
Erstusstrahlig (de): 13. Septämber 1991
auf ZDF
Synchronisation

D Simpsons isch e US-amerikanische Zaichetrickserie, wu vum Matt Groening gschaffe un scho mit e Huffe Emmy-Awards uuszaichnet woren isch. D Serie isch die US-Zaichetrickserie, wu em lengschte lauft; bis jetz sin in dr USA uf em Sender FOX iber 450 Episode uusgstrahlt wore. Ändi Juli 2007 isch au Die Simpsons – Der Film wältwyt in d Kino chuu. Derzue erschyne d Simpsons au as Comic un in Computerspil.

Geschichte der Produktion[ändere | Quälltäxt bearbeite]

dr Matt Groening, dr Schepfer vu dr Serie

Dr James L. Brooks isch dur d Comicserie „Life in Hell“uf dr Matt Groening ufmerksam wore. Är het em Groening 1985 aagruefe un em aabotte, ebis fir d Tracey Ullman Show z zaichne. Bi däm Dräffe soll dr Groening derno ghert haa, ass er ebis Neis un Uußergwehnligs sott bresäntiere. Derno heb er in 15 Minute d Figure zue dr Serie zaichnet. Doderby soll em au d Idee chuu syy, ass dr Homer in em Atomchraftwärch schafft.[1] In eme Interview het er gsait, ass er bi sällem Dräffe sich entschlosse heb, nit, wie urspringli blant, us dr Comicserie „Life in Hell“ e Fernsehserie z mache, wel derno d Rächt an „Life in Hell“ hätt mieße abgee. Statt däm het er spontan d Idee zue dr Die Simpsons entwicklet.[2] Die Simpsons isch s erscht Mol am 19. April 1987 as Churzfilm in dr Tracey Ullman Show gsändet wore. D Figure sin dert no arg grob zaichnet gsi, wel dr Matt Groening ghofft gha het, ass d Animatore sin no weng fyyner umsetze, si hän si aber d Skizze ohni Änderige iberdrait.[3] Anne 1989 isch d Idee vum Färnsehsänder FOX zuen ere Färnsehserie uusböue wore, wu dert syterhär all Wuche lauft. D Serie isch in dr erscht drei Stapfle vu dr Produktionsfirma Klasky Csupo produziert wore. Syt dr vierte Produktionsstapfle isch Film Roman derfir verantwortli. Ihri Erschtuusstrahlig im dytsche Sprochruum het d Serie anne 1991 im ZDF gha, syt 1994 wird si uf ProSieben uusgstrahlt un isch derzue au no bi Sat.1 Comedy z empfange. Z Eschtryych lauft d Serie uf ORF 1 un in dr Schwyz uf SF zwei im Zweekanalton. In dr USA sin „The Simpsons“ di langläbigscht Prime-Time-Serie un derzue au no bis jetz erfolgryychscht Zaichetrickserie. 1997 het d Serie d Familie Feuerstein im iberholt as Zaichetrickserie, wu am lengschte in dr Prime Time lauft, un het doderfir e Yydrag in s Guinness-Buch der Rekorde iberchuu.[4] E churzi Zytlang (2004/2005) het d Serie vu Scooby-Doo meh Episode gha wie Die Simpsons. Anne 2009 isch d Serie au yyzaichnet wore fir di lengscht Laufzyt vun ere Sitkom un as Serie mit dr maischte Emmy-Awards, dodermit het d Serie vier Rekord im Guiness-Buech.[5]

Handlig[ändere | Quälltäxt bearbeite]

Hauptschauplatz isch di fiktiv US-Stadt Springfield, e Ortsnamme, wu s in dr USA vilmol git. Uf die Art wird versuecht, d Trivialitet vu dr Handligssituation uuszdrucke: Springfield cha in jedem Bundesstaat syy, s git s aber in dr Wirkligkeit gar nit. Versterkt wird dää Effäkt no dur dr „Running Gag“, ass dr Bundesstaat nie verrote wird, wu d Simpsons läbe. D Simpsons wohne z Springfield in 742, Evergreen Terrace. Verschideni Aschpäkt vum US-amerikanische Alldagsläbe (Fast-Food, Färnseh, Religion, Korruption usw.) wäre karikiert un doderdur au – zem Dail uffe, zem Dail verstecklet – kritisiert. Dr Schurnalischt Tim Schleider schrybt iber d Serie: „Die Serie ist eine mitunter bösartige, hoch zynische Abrechnung mit dem ‚American Way of Life‘ und den Idealen des ‚American Dream‘. Viele Folgen stecken voller Anspielungen und sind gespickt mit Seitenhieben auf die US-amerikanische Alltagskultur. Und Groening nimmt sie alle aufs Korn – Fitness-Gurus, religiöse Eiferer, Waffennarren, Konsumverrückte, Fernsehjunkies, Fast-Food-Opfer, Fortschrittsgläubige, Spießer, Radikalfeministinnen und dergleichen mehr. Für Kinder nur bedingt empfehlenswert, für Amerika-Fans ein Muß!“[6]

Karakter[ändere | Quälltäxt bearbeite]

Typisch fir D Simpsons isch, ass sich der Großdail vu dr Lyt in dr Serie us eme braite, aber ainewäg iberschaubare Spektrum vu Springfield-Bewohnern bstoht. D Haupthandlig vu dr ainzelne Folge wird aber allwyyl drait vu dr Aagherige vu dr Familie Simpson, in dr Hauptsach vum Homer, em Marge, em Lisa un em Bart Simpson. S Maggie Simpson isch zmaischt nume passiv derbyy bi dr Haupthandlig.

Homer Simpson[ändere | Quälltäxt bearbeite]

Dr Homer Jay Simpson isch s Familieoberhaupt vu dr Simpsons, dr Mann vum Marge un dr Vatter vum Bart, vum Lisa un em Maggie. Syy Alter schwankt je no Episode zwische 36 un 42 Johr. Är schafft im Springfielder Atomchraftwärch as Sicherheitsinschpekter im Sektor 7G, au wänn er doderfir fascht kai Qualifikation het. In dr erschte Folge het er kai bsunderi Stellig gha. Syy Scheff isch dr Charles Montgomery Burns.

Dr Homer isch e fuule „Couch-Potato“, infantil un vergniegigssichtig, het e gringi Ufmerksamkeitsspanne, e nider Reflexionsnivoo un naigt derzue zue drastische Gfielsuusbruch. Är het e Ässsterig un noch em Fyroobe suft er ain in s Moes Taverne, syy Liebligsdrinke isch Duff-Bier. Dr Homer isch d Iberzaichnig vum klassische Antiheld, wu trotz vu dr karakterlige Mängel, wu uffalle, ainewäg e Sympatiidreger isch. Är het kai besi Absichte un wird in dr maischte Folge as dailwyys desinträssierte, aber ainewäg ehrlige Familiemänsch zaigt. In dr eltere Stapfle het si dr Homer no meh Mie gee um syy Familie.

Dr Matt Groening het dr Homer no syym Vatter gnännt.

Marge Simpson[ändere | Quälltäxt bearbeite]

S Marjorie „Marge“ Simpson, geboreni Bouvier, d 34-jehrig Frau vum Homer un d Mueter vum Bart, em Lisa un em Maggie, isch di guet Seele in s Simpsons Huus. S opferet sich uf fir ihri Familie un fiert dr Huushalt. Us däre Roll bricht s nume sälte uus; s verdrängt ihri Gfiel vilmol; wänn si derno aber uusbräche, wird s ärnscht. S Marge isch im Gegesatz zum Homer kulturäll inträssiert. Derzue isch s e seli gueti Moleri, het friejer emol Chunscht studiert. S het starki moralischi Grundsätz, wu s au an d Chinder versuecht wyter z gee. Ar sälte verfallt s dr Spilsucht, was aber nie lang goht. Ihre grescht Markezaiche si ihri blaue ufdirmte Hoor.

Dää Karakter isch aaglähnt an d Margaret „Marge“ Groening, d Mueter vum Matt Groening.

Bart Simpson[ändere | Quälltäxt bearbeite]

Dr Bartholomew „Bart“ Jo-Jo Simpson, alias „El Barto“, alias „Bartman“, isch dr zehjehrig Suhn vum Homer un em Marge un zwai Johr un 38 Däg elter wie s Lisa. Är goht in di viert Klass vu dr Grundschuel z Springfield, wu vum Räkter Seymour Skinner glaitet wird. Syy Klasselehreri isch s Miss Edna Krabappel. Dr Bart isch dr typisch Klassegloon, arg fräch un friezytig. Syy Schwechine lige in ere gringe Konzentrationsfähigkait un syyre Shrimps-Allergii. Dr Name Bart isch e Anagramm fir brat, was uf Alemannisch sovil haißt wie Balg. Dr Bart isch au di erscht vu dr Simpsons-Figure gsi, wel dr Matt Groening aafangs e Gschicht iber e fräche Bue het welle verzelle, wu nie folgt. Dr bescht Kamrad vum Bart isch dr Milhouse Mussolini van Houten.

Wie dr Vorname vum Matt Groening isch au dr Namme Bart us dr Bibel: Matthew (Matthäus) un Bartholemew (Bartholomäus).

Lisa Simpson[ändere | Quälltäxt bearbeite]

S Lisa Marie Simpson, acht Johr alt, isch s zwait vu dr Simpson-Chinder un mit eme IQ vu 159 hochbegabt. Si goht in d zwot Klass vu dr Grundschuel vu Springfield unter dr Laitig vum Miss Hoover. Dert ghert s zue dr Vorzaigeschueler vu dr Schuel un wird vu ihre Mitschueler vilmol as Streberi blogt. S het au kai ächti Frynd oder Fryndine, wäge däm isch s vilmol druurig un verzwyyflet. Si spilt Baritonsaxophon, isch Vegetarieri, Buddhischti un Umwältschutzaktivischti. S Lisa fielt si vu dr Wält un vor allem vu ihre Familie missverstande. Dr Homer het e bsunder Verhältnis zum Lisa, är isch seli stolz uf syy Dochter. Wänn s Lisa ebis vun em will, isch d Gegefrog aallwyl: „Ja, was ist denn, mein Schatz?“. Au sunscht versuecht dr Homer em Lisa allwyyl z hälfe.

Lisa isch dr Name vu dr Schweschter vum Matt Groening.

Maggie Simpson[ändere | Quälltäxt bearbeite]

S Margaret „Maggie“ Simpson isch mit aim Johr s jingscht Mitglid vu dr Familie. Si drait fascht immer e blaue Schlofsack-Strampelaazug un nuckelet fascht immer an syym Lulli. S Maggie het fir syy Alter ussergwehnligi Fähigkaite, zem Byschpel het si in aire Folg uf eme pentatonische Metallophon Dail vu dr Nussknacker-Suite gspilt, derzue cha s Saxophon spile. In dr Familie wird nume sälte Achtig gee uf s Maggie. Nume in dr Folg Am Anfang war das Wort sait si aimol ai Wort: „Daddy“. D Elizabeth Taylor het em Maggie doderfir ihri Stimm gee. Im Abspann vum Kinofilm sait s s zwait Mol e Wort: „Fortsetzung?“. In e baar Episode git s e Blick in d Zuechumpft. Do isch s Maggie groß un cha scho schwätze, wird aber alliwyl vu eberem unterbroche.

Au dr Name vm Maggie goht uf e Schweschter vum Matt Groening zruck.

Literatur[ändere | Quälltäxt bearbeite]

  • Matt Groening, Ray Richmond, Antonia Coffman: Die Simpsons – Der ultimative Serienguide 2001, ISBN 3-89748-323-8
  • Matt Groening, Scott M. Gimple: Die Simpsons Forever – Der ultimative Serienguide 2 2001, ISBN 3-89748-517-6
  • Michael Gruteser, Thomas Klein, Andreas Rauscher: Subversion zur Prime-Time – Die Simpsons und die Mythen der Gesellschaft 2002, ISBN 3-89472-336-X
  • Daniel Kehlmann: Voltaire und Starbucks. Artikel in Der Spiegel 23/2006, S. 144ff.
  • Patrick Steinwidder: Jenseits der Unschuld, diesseits der Politik. „Die Simpsons“ als (kritische) Medien-Lernwelt. Medienwissenschaftlicher Artikel in Medien-Impulse, hg. vom Österreichischen Ministerium für Unterricht und Kunst, Nr. 56/2006, S. 61ff.
  • Christian Klager (Hrsg.): Philosophieren mit den Simpsons. Didaktische Überlegungen und Unterrichtsvorschläge. Münster 2009. ISBN 978-3-86582-860-6
  • Paul Halpern: Schule ist was für Versager. Was wir von den Simpsons über Physik, Biologie, Roboter und das Leben lernen können. 2008, ISBN 978-3-499-62385-1
  • Brunetto Salvarani: Bart trifft Gott: Das Evangelium der Simpsons. 2009, ISBN 978-3-7887-2395-8

D Simpsons-Bibliothek vu dr Wyyshaite[ändere | Quälltäxt bearbeite]

(alli vum Matt Groening)

Weblink[ändere | Quälltäxt bearbeite]

 Allmänd (Commons): Die Simpsons – Sammlig vo witere Multimediadateie

Fueßnotte[ändere | Quälltäxt bearbeite]

  1. Die Entstehung der Simpsons
  2. Groening, Matt. Interview mit em David Bianculli. Fresh Air. National Public Radio. WHYY Philadelphia, 14. Februar 2003, abgruefe am 8. Augschte 2007
  3. History Of The Simpsons
  4. fox.com: The Simpsons - Returning Series
  5. Comic-Con: The Simpsons Awarded Guinness World Record for Longest Running Sitcom|, abgruefe 24. Augschte 2009
  6. Stuttgarter Zeitung, 13. Jänner 1993