«D Vöögel» vom Aristofanes

D Vöögel (altgriech. Ὄρνιθες, Ornithes) isch e Komödie vom antike griechische Dichder Aristofanes. Si isch im Jahr 414 v. d. Z. wääred em Peloponnesische Chrieg zum erste Mol ufgfüert worde und beschribt, wie zwäi Exilante us Athen de Vöögel hälfe, d Macht z ergriffe. S Theaterstück bestoot us fümf Akt und vili halte s für s glungnigste Stück vom Dichder.

D Handlig

Zwäi Athener, dr Peithetairos (vo griech. Πειθεταίρος = „Berooter“) und dr Euelpides (vo griech. Ευελπίδης = „gueti Hoffnig“) zien us Athen furt. Si chömme zum Balast vom Köönig vo de Vöögel. Dä isch ee ehemolige Athener, wo vo sine Mitmensche schlächt behandlet worde isch und denn sälber e Voogel, e Wiidehopf, worde isch. Wil d Macht vo de Vöögel seer chli sig, schloot dr Peithetairos vor, ass si e Stadt im Himmel wurde baue und eso dr Vercheer zwüsche de Mensche und de Götter chönni kontrolliere. Si bringe d Voogelversammlig drzue, däm Blaan zuezstimme und d Stadt, wo dr Naame Wulkeguggershäim überchunnt, wird baut. D Vöögel fliege über Athen, so dass d Stadt kä Sunne me überchunnt und im Voogelmist foot afo versticke, und sich underwirft. Au d Götter si am verhungere, wil si d Opfere vo de Mensche nüme überchömme, und schliesse schliesslig e Verdraag mit de Vöögel ab. Dr Peithetairos bechunnt d Basileia, e Dochder vom Zeus zur Frau und wird zum Herscher vo de Vöögel.

Dr Hindergrund

Das Wärk gältet as Kritik an dr Politik vo Athen zu sällere Zit, besundrigs under em Perikles. D Stadt isch denn im Seebund nüme e Primus inter pares gsi sondern zum Imperium worde, wo d Bundesgenosse mit Droige beherscht het. Dä Wille zur Macht het denn zum Peloponnesische Chrieg gfüert.

Litratuur

• Aristophanes: Die Vögel. Stuttgart, Reclam 1986. ISBN 3-15-001379-8.

Weblingg

• Digitalisierte Volltext vo Die Vögel (Aristophanes) bi Zeno.org
• Kritik vom Stefan Aigner

Dä Artikel basiert uff ere fräie Übersetzig vum Artikel „Die_Vögel_(Aristophanes)“ vu de dütsche Wikipedia. E Liste vu de Autore un Versione isch do z finde.