Barbara Hendricks

d Barbara Hendricks (2015)

D Barbara Anne Hendricks (* 29. April 1952 z Kleve) isch e dytschi Bolitikeri (SPD). Vum 17. Dezember 2013 bis zum 14. Merz 2018 isch si Bundesminischteri fir Umwält, Naturschutz, Böu un Reaktorsicherhait gsii.

Vu 2007 bis 2013 isch si Bundesschatzmaischteri vu dr SPD un vu 1998 bis 2007 barlemäntarischi Staatssekretäri bim Bundesfinanzminischter gsii.

Läben un Beruef

d Barbara Hendricks un d Angela Merkel im Ramme vu dr Vaeraastaltig zue dr Unterzaichnig vum Koalitionsverdrag (2013)

Noch em Abitur 1970 am Johanna-Sebus-Gymnasium z Kleve het d Barbara Hendricks e Studium vu dr Gschicht un dr Sozialwiseschafte an dr Universiete Bonn absolviert, wu si anne 1976 mit em erschte Staatsexame fir s Lehramt an Gymnasien abgschlosse het. Derno het si bis 1978 bim Dytsche Studäntewärch gschafft un derno bis 1981 as Referänti bi dr Prässestell vu dr SPD-Bundesdagsfraktion. Anne 1980 het si zum Dr. phil. promoviert mit dr Arbet Die Entwicklung der Margarineindustrie am unteren Niederrhein. Bis 1990 isch si Prässesprächeri vum Finanzminischter vum Land Nordrhy-Weschtfale gsii. Anne 1991 isch si zur Minischterialretin im Minischterium fir Umwält, Ruumornig un Landwirtschaft vum Land Nordrhy-Weschtfale ernännt wore. D Barbara Hendricks isch Mitglid vum Kuratorium vu dr Stiftig Aktion Pro Humanität un vu dr Bundesstiftig Magnus Hirschfeld.

D Barbara Hendricks läbt z Berlin un in ihre Haimetstadt Kleve. Ändi Dezämber 2013 het si d Beziehig zue ihre Läbespartneri effetli gmacht. Am 30. Oktober 2017 het d Hendricks z Kleve ihri Läbespartneri Valérie Vauzanges ghyrote.

Bolitik

Bartei

Syt 1972 isch d Barbara Hendricks Mitglid vu dr SPD un syt 1989 Vorsitzeri vum SPD-Unterbezirk Chrais Kleve. Vu 1990 bis 2001 isch si Mitglid im Barteirot gsii. Vu 1987 bis 2001 isch si Mitglid im Landesvorstand vu dr SPD Nordrhy-Weschtfale gsii, dervu in dr Johr ab 1996 as Schatzmaischteri. Syt 2001 isch si Mitglid im Barteivorstand vu dr SPD. Syt Oktober 2007 isch si Bundesschatzmaischteri vu dr SPD gsii. In däre Funktion het si as Generaldreihänderi fir d SPD 94,67 % vu dr Aadail an dr Dytsche Druck- un Verlagsgsellschaft mbH (DDVG) ghebt.

Fir d Bundestagswahl 2009Bundesdagswahl 2009 isch d Hendricks Mitglid im Schattekabinett vum SPD-Chanzlerkandidat Frank-Walter Steinmeier gsii, zuestädnig fir d Ressort Verbruucherfrogen un Aalegerschutz. D Hendricks isch Mitglid vum Vorstand vum Kulturforum vu dr Sozialdemokraty mit em Themeschwärpunkt Kulturfinanzierig un isch Vositzeri vu dr Mandatsbriefigs- un Zellkommission bim Mitglidervotum vu dr SPD zum Koalitionsverdrag 2013 gsii.

Abgordneti

Vu 1984 bis 1989 het d Hendricks em Chraisdag vum Landchrais Kleve aaghert.

Syt 1994 isch si Mitglid vum Dytsche Bundesdag. Do het si vu Oktober 1995 bis Novämber 1998 em Vorstand vu dr SPD-Bundesdagsfraktion aaghert. Si isch alliwyl iber d Landeslischt Nordrhy-Weschtfale in Bundesdag yyzoge.

Effetligi Ämter

No dr Bundesdagswahl 1998 isch d Barbara Hendricks am 27. Oktober 1998 as barlemäntarischi Staatssekretäri bim Bundesminischter vu dr Finanzen in di vum Bundeschanzler Gerhard Schröder gfiert Bundesregierig beruefe wore. In däm Amt het si au dr syt em 22. Novämber 2005 vu dr Bundeschanzleri Angela Merkel gfeierte Bundesregierig aaghert. Dodermit isch d Barbara Hendricks barlemäntarischi Staatssekretäri unter insgsamt drei Finanzminischter gsii, nämli unter em Oskar Lafontaine, em Hans Eichel un em Peer Steinbrück. Wu si zue dr Bundesschatzmaischteri vu dr SPD gwehlt woren isch, isch si am 16. Novämber 2007 us em Amt gschide.

Am 17. Dezämber 2013 het dr Bundesbresidänt Joachim Gauck d Hendricks zur Bundesminischteri fir Umwält, Naturschutz, Böu un Reaktorsicherhait ernännt.

Uuszaichnige

• 2008, zämme mit em Reinhard Loske: Adam-Smith-Preis für marktwirtschaftliche Umweltpolitik vum Forum Ökologisch-Soziale Marktwirtschaft

Schrifte

• Barbara Hendricks: Steuergerechtigkeit für Familien. In: Wolfgang Thierse (Hg.): Religion ist keine Privatsache. Patmos Verlag, Düsseldorf 2000.

Weblink

•  Commons: Barbara Hendricks – Sammlig vo Multimediadateie
• Websyte vu dr Barbara Hendricks
• Biographie beim Deutschen Bundestag
• Barbara Hendricks uf abgeordnetenwatch.de

Fueßnote

Dä Artikel basiert uff ere fräie Übersetzig vum Artikel „Barbara_Hendricks_(Politikerin)“ vu de dütsche Wikipedia. E Liste vu de Autore un Versione isch do z finde.