Baetica

Us der alemannische Wikipedia, der freie Dialäkt-Enzyklopedy
Römischi Browinz
Baetica
D Browinz Baetica im Römische Riich
iigrichdet: Riichsreform vom Augustus
Vorgänger: Hispania ulterior
het bestande bis: Zum Iifall vo de Wandale

Hispania Baetica oder nume Baetica isch dr latiinischi Naame von ere antike Landschaft und römische Browinz im Süde vo dr Iberische Halbinsle. E groose Däil isch s hütige Andalusie, im Norde isch si bis in d Extremadura gange. Si het iire Naame vom groosse Fluss Baetis, em hütige Guadalquivir, überchoo. Dr Naame Baetica isch mit dr arabische Eroberig verschwunde.

Verwaltig[ändere | Quälltäxt bearbeite]

Baetica isch e senatorischi Browinz gsi. Si isch nid diräkt em Kaiser, sondern em Senat understande, won e Prokonsul mit em Rang vom ene Prätor gweelt het, zum sä regiere. E prokonsularische Legat und e Quästor häi zur Verwaltig vom Prokonsul ghöört.

Iirichdig und Gränze[ändere | Quälltäxt bearbeite]

In dr republikanische Zit het s Gebiet zur Browinz Hispania ulterior ghöört, wo dr Süde und Weste vo dr Iberische Halbinsle umfasst het. Wo dr Kaiser Augustus si Browinzreform gmacht het, isch Hispania ulterior in zwäi Däil ufdäilt worde, in Hispania Baetica (Südoste) und Lusitania (Nordweste). D Baetica het jetzt im Weste und Nordweste e Gränze mit Lusitania ghaa, öbben em Fluss Anas (hüte Guadiana) nooch, im Oste mit dr groosse Browinz Hispania citerior; an dr Middelmeerküste isch die Gränze südwestlig vo Carthago Nova (Cartagena) verloffe und vo dört in Richdig Westnordwest. Spööter het dr Augustus d Gränze verschoobe, sodass d Hispania citerior non e Däil vo dr Baetica öberchoo het; sithär isch d Gränze an dr Küste in dr Nööchi vo dr hütige Stadt Almería verloffe und vo dört gege Nordweste.

Wenn dr Augustus d Browinz iigrichdet het, isch umbekannt. Dr eltisti Beleeg isch en Inschrift us em Joor 2 noch dr Zitwändi, wo Hispania ulterior Baetica erwäänt wird.[1] Die offizielli Bezäichnig Hispania ulterior Baetica het mä bis in d Zit vom Kaiser Trajan brucht, spööter het d Browinz nume no Hispania Baetica oder äifach Baetica ghäisse.[2]

Liddratuur[ändere | Quälltäxt bearbeite]

  • Géza Alföldy: Fasti Hispanienses. Senatorische Reichsbeamte und Offiziere in den spanischen Provinzen des römischen Reiches von Augustus bis Diokletian, Steiner, Wiesbaden 1969
  • Tilmann Bechert: Die Provinzen des römischen Reiches. Einführung und Überblick. von Zabern, Mainz 1999, ISBN 3-8053-2399-9, S 65–71.
  • Franz Braun: Die Entwicklung der spanischen Provinzialgrenzen in römischer Zeit, Berlin 1909
  • Carmen Castillo Garcia: Städte und Personen der Baetica. In: Aufstieg und Niedergang der römischen Welt Bd. II 3, de Gruyter, Berlin 1975, ISBN 3-11-005838-3, S. 601–654
  • Rudolf Haensch: Capita provinciarum. Statthaltersitze und Provinzialverwaltung in der römischen Kaiserzeit, Mainz 1997, ISBN 3-8053-1803-0
  • Patrick Le Roux: L’armée romaine et l’organisation des provinces ibériques d’Auguste à l’invasion de 409, Paris 1982, ISBN 2-7018-0002-1
  • Daniel Nony: Die spanischen Provinzen. In: Claude Lepelley (Hrsg.), Rom und das Reich in der Hohen Kaiserzeit, Bd. 2: Die Regionen des Reiches, München 2001, ISBN 3-598-77449-4, S. 121–150 (Überblick mit guter Bibliographie)
  • Walter Trillmich und Annette Nünnerich-Asmus (Hrsg.): Hispania Antiqua – Denkmäler der Römerzeit. von Zabern, Mainz 1993, ISBN 3-8053-1547-3

Fuessnoote[ändere | Quälltäxt bearbeite]

  1. CIL VI 31 267.
  2. Castillo Garcia S. 604.

Weblingg[ändere | Quälltäxt bearbeite]

 Commons: Baetica – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Baetica“ vu de dütsche Wikipedia. E Liste vu de Autore un Versione isch do z finde.