Augustinus von Hippo

Us der alemannische Wikipedia, der freie Dialäkt-Enzyklopedy

Dr Augustinus vo Hippo (354-430), mänggisch au dr Heilig Augustin oder Augustinus vo Tagaste, isch ein vo de früehchristlige Chilleväter gsi.

[ändere] Läbe

Dr Augustin, isch as Aurelius Augustinus am 13. Novämebr 354 z Tagaste in Numidie (hützudag Annaba z Algerie) uf d Wält cho. Er isch zerst z Tagaste uf d Schuel gange, denn het en si Familie noch Madauros und schliesslig noch Karthago zum studiere gschiggt. Dört het er e philosophischs Wärk gschriibe, wo aber verlore gangen isch. 383 isch er noch Rom gange. Denn het er e Lehrstell as kaiserliche Rhetorikbrofässer z Mailand übercho, wo denn d Residänz vom Kaiser gsi isch. Noch zwei Johr isch er noch Tagaste zrugg. Wo si Bueb, dr Adeodatus, im Johr 390 gstorben isch, het er si Familiebsitz z Tagaste verchauft. Er isch denn in dr Küstestadt Hippo mehr oder weniger zwunge worde, Kleriker z wärde. Er het zum orthodoxe Christedum ghört, wo vo de Kaiser understützt worden isch, und het si Version vom Glaube de lokale Iiwohner, wo nit immer zur gliiche Glaubensrichdig ghört hai, chönne begriflig mache. 391 isch er e Presbyter (e Briester) worde und vo 396 bis zu siim Dod im Johr 430 isch er dr Bischof vo Hippo gsi, ere Stadt, won er nie ganz deheim gsi isch drin. Er het afo Büecher schriibe, won er drin dr Manichäismus agriffe het, ere Glaubensrichdig won er as Teenager drzueghört het. Die afrikanischi christligi Dradition, dr Donatismus (noch em Donatus, eim vo de früehe Chilleväter) isch vo dr offizielle Chille noch dr Regierigsziit vom Konstantin em Grosse (305-337) as schismatisch verurdeilt worde. Dr Augustin und dr Bischof vo Kathago, dr Aurelius, hai se in Büecher bekämpft und ere au politisch Schwiirikeite gmacht. 411 vom 1. bis zum 8. Juni het dr Kaiser en öffentligi Debatte, wo Hunderti vo Bischöf drbii gsi si, lo abhalte und die het d Position vo dr offizielle Chille understützt. Druf si d Freiheite vo de Donatiste vo Gsetz us igschränggt worde und em Augustin siini Richdig het gwunne. Denn, won e Briester, dr Pelagius, vorbiicho isch und bredigt het, het er däm siini Idee afo agriffe, au wenn die andere Kleriker nit so ganz verstande hai, wiso er sich so vergelsteret. Churz vor siim Dod het non e Agriff uf dr italiänisch Bischof Julian vo Eclanum vorbereitet. Er isch am 28. August 430 z Hippo Regius gstorbe.

[ändere] Quelle

• Dr Ardikel "Augustine, Saint" in Encyclopædia Britannica. Ultimate Reference Suite. Chicago: Encyclopædia Britannica, 2009.