Aargauer Kantonsbibliothek
D Aargauer Kantonsbibliothek, wo z Aarau stoot, isch en öfentlichi Bibliothek vom Kanton Aargau.
Si sammlet und hüetet möglichscht alli Schrifte, wo im Kanton gschriben und truckt wäärde oder wo dr Aargau drin vorchunt. Es isch es modärns Zäntrum für d Informazioonsvermittlig, und d Kantonsbibliothek luegt au zum aargauische Bibliotheksnetz.
Agfange het s i dr Zyt vo der Helvetik, wo dr Kanton Aargau d Büecher und Schrifte vom Beat Fidel Zurlauben (1720–1799) a sich zoge het. Anne 1807 isch denn d Kantonsbibliothek offiziell gründet worde. Im 19. Joorhundert het d Bibliothek die grosse alte Buechsammlige vo de Chlööschter Muri und Wettingen übernoo. Drum het s im Bestand au ganz alti Sache sid em Mittelalter so wie öppe s Oschterspiil vo Muri us em drizääte Joorhundert und mee als achthundert Büecher, wo vor 1500 truckt sind.
Sit 2016 macht d Kantonsbibliothek zäme mit em Staatsarchiv Aargau die gmeinsami Instituzioon «Bibliothek und Archiv Aargau» uus.
Bsunderi Sammligen i dr Bibliothek sind s Archiv vom Verlaag Suurländer und d Schrifte vo Wüüseschaftler und Schriftsteller us em Aargau.
Weblink[ändere | Quälltäxt bearbeite]
Koordinate: 47° 23′ 22,7″ N, 8° 2′ 41,5″ O; CH1903: 645772 / 248935