2001: Odyssee im Weltraum

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Filmdate
Änglischs Orignalplakat
Änglischs Orignalplakat
Düütsche Titel: 2001: Odyssee im Weltraum
Orginaltitel: 2001: A Space Odyssey
Produktionsland: UK, USA
Erschinigsjoor: 1965–1968
Längi (PAL-DVD): 139 Minute
Orginalsprooch: Englisch
Altersfreigaab: FSK 12
Stab
Regie: Stanley Kubrick
Dräibuech: Stanley Kubrick
Arthur C. Clarke
Produktion: Stanley Kubrick
für MGM
Musig: u. a. Richard Strauss (Also het dr Zarathustra gsait,
Johann Strauß (An dr schöne blaue Done)
Kamera: Geoffrey Unsworth
Schnitt: Ray Lovejoy
Bsetzig
Dialäkt: Markgräflerisch (Ebringe)

2001: Odyssee im Weltruum isch e sehr bechannte un iflussriicher englische Science-Fiction-Film vu anno 1968, wo uf dr Churzgschichte The Sentinel vum Arthur C. Clarke basiert.

Regie het dr berühmt Filmmacher Stanley Kubrick gfüehrt. Er het in Zämmearbet mit em Clarke au s Drähbuech entwicklet.

Dr Film enthaltet e Reihi vu Spezialeffekte, wo in dr 1960er sensationell gsi sin un au hüt noch verblüffe, wie zum Bispil d Darstellig vu künstlicher Schwerkraft, Schwerelosigkeit un im Dave si Reise am End vum Film.

Bemerkenswert isch au do wiider die bechannt Detailversesseheit vum Kubrick. Im Kubrick si Aspruch isch immer gsi, mit sine Film Standards z setze, so au do dr Standard fer dr perfekte Science-Fiction-Film.

Im Gegesatz zue viile andere im Weltruum spilende Filme isch dorum s All bim Kubrick lutlos und eifach trostlos leer. Un natürlich isch in großer Entfernig vu dr Erde wäge dr Endlichkeit vu dr Liechtgschwindigkeit au kei Echtzittkommunikation meh möglich, was au dr Film - anderst als viili anderi Science-Fiction-Filme - berucksichtigt. Einzig bim Flueg vum Krater Clavius zum Monolith im Krater Tycho isch im Kubrick e Fähler underloffe, wil so e Flueg numme als nidrige Mondorbit verlaufe chännt un dodemit im Ruumschiff Schwerelosigkeit herrsche müesst - was aber im Film offechundig nit dr Fall isch. Verblüffend isch au dr Afang vum Film: E Horde vu Australopithecine entdeckt inspiriert vum e plötzlich uftauchte Monolith dr Gebruuch vu Chnoche un Werchzüg au als Waffe. Betitelt isch des als poetisch als "Dawn of Man" - d Morgeröti vum Mensch. Dr dytsch Filmversion het do eweng uglücklich Aufbruch der Menschheit (Ufbruch vu dr Menschheit) drus gmacht

D Filmmusik wird vu dytsche Rundfunksymphonieorchester gspilt. Am bechannteste - un immer wiider zitiert - isch's Intro vu "Also sprach Zarathustra" vom Richard Strauß.

Immer wiieder gern zitiert wird dr Computer HAL, au wenn em Deep Thought inzwische dr Rang abgloffe het. S Ruumschiff "Discovery" isch offechundig s Vorbild vu dr "Herz us Gold" im Film Per Anhalter dur d'Galaxis un au s Space Shuttle Discovery dirft wohl vu dert her si Namme ha.

Dr Film isch im berühmte welthistorische „Umbruchjoohr“ 1968 erstmols in d Kinos chu un isch ufgrund vu sinem fer Science-Fiction-Filme eher utypische mystisch-philosophische Charakter schnell zue eme Kultfilm vu dr Hippie- un New-Age-Bewegig avanciert. Noch hüt sorgt dr Inhalt fer Diskussione. Si Faszination isch villiicht au dodur bedingt, dass er viili Interpretatione zuelosst un meh Froge stellt wie beantwortet. Trotzdem losst sich d'Gsamtussag vum Film am End grob so formuliere: E Parabel yber d'Evolution vum intelligente Läbe un e Gratwanderig zwische Bewunderig vu dr technologische Errungeschafte un dr Kritik an dr rationalisierte menschliche Zivilisation.

D Kritik het im Film aber au "gedanklichi Yberfrachtig" vorgworfe - so in dr Rezension vum Dark Star vu John Carpenter. Säller Film sei e Parodi uf 'gedanklich yberfrachtiti' Film wie 2001.

D Fortsetzig "2010 - S Johr in dem mir Kontakt ufnämme" vu 1984 chummt an 2001 nit dra, isch aber trotzdem e solide un passable Science-Fiction-Film. Gegenyberm Roman vum Clarke (wo fer 2010 d Chinese als nöii Supermacht in Konkurrenz zue verbündete Sowjets un Amerikaner siht) reduziert säller Film dr Plot leider uf dr klassisch Ost-West-Konflikt.

Beidi Film - un meh noch die wittere, no nit verfilmte Furtsetzigsromane vum Clarke, 2061 un 3001, berucksichtige immer dr aktuellst Stand vu dr Forschig un stelle s Jupitersystem insofern im Rahme vu dr aktuelle wisseschaftliche Theorie koorekt dar.

Uszeichnige[ändere | Quälltäxt bearbeite]

  • Oscar 1968 fer Stanley Kubrick (Spezialeffekte)
  • BAFTA-Award für Geoffrey Unsworth (British Cinematography)
  • BAFTA-Award für Tony Masters, Harry Lange un Ernest Archer (Art Direction)
  • BAFTA-Award für Winston Ryder (Soundtrack)
  • Cinema Writers Circle Award (Spanien) (Bester usländischer Film)
  • David di Donatello Award fer Stanley Kubrick (Italie) (Cinema Straniero)
  • Oscar-Nominierig 1968 fer Tony Masters, Harry Lange, Ernie Archer (Usstattig)
  • Oscar-Nominierig 1968 fer Stanley Kubrick, Arthur C. Clarke (Original-Drillbuech)
  • Oscar-Nominierig 1968 fer Stanley Kubrick (Regie)
  • BAFTA-Award Nominierig 1968 fer Stanley Kubrick (Bester Film)
  • BAFTA-Award Nominierig 1968 fer Stanley Kubrick (United Nations Award)
  • Directors Guild of America Nominierig 1968 fer Stanley Kubrick (Feature Film)

Literatur[ändere | Quälltäxt bearbeite]

Externi Site[ändere | Quälltäxt bearbeite]