Wikipedia:Wp/swg/Schbätzlà

Schbätzlà sen à schwäbischs Doigerzeignis. Se säàt eenlich àus wie Nudlà, werràt abr ândrsch härgschdellt. Em Doig isch koi Hartwaizàgriàs dennà, dòdrfier benutzt mr à normals Määl on duàd Oier, Wassr on Salz nai. Dr Doig isch zimmich woich, deshalb duàd mrn sofort ens hoiße Wassr nai. Dodrfier kâmmer se schabà oddr mr nemmt à Schbätzlespräss. Ob mr se nochm Kochà nò abschreggà soll isch à religjese Fròg.

D Schbätzlà kâ mr als Beilag nemmà oddr au als oigàs Gericht, zom Beischbiel als Kässchbätzlà. Bekânnde Gericht mit Schbätzlà sen außrdem no dr Gaisburger Marsch on d Lensà mit Schbätzlà. Em Sommer machàt manche Leit au kalde Essichschbätzlà zur Erfrischong.