Wikipedia:Profil/Entwurf3

Us der alemannische Wikipedia, der freie Dialäkt-Enzyklopedy

des isch e Entwurf fir e Nejfassig vum Wikipedia:Profil.


Di Alemannisch Wikipedia - e alemannischsprochigi Enzyklopedi mit Informatione iber Alemannisch un Informatione uf Alemannisch.


D Wikipedia isch e cheschtelosi Online-Enzyklopedi vu dr Wikimedia Foundation, ere gmeinnitzige Stiftig mit Sitz z Florida. Mittlerwyli git s d Wikipedia in iber 270 Sproche, eini dervu isch Alemannisch.


Di alemannisch Wikipedia isch e Enzyklopedi, wu in alleni Dialäktspiilarte vum alemannische Sprochruum gschribe wird. Des Projäkt bringt Mänsche häne wie däne vu dr Gränze zämme, us dr Dütschschwyz, us Sidweschtdytschland, em Elsass, em Vorarlberg un au us de Walserderfer z Norditalie. Di alemannisch Wikipedia isch sprochli wie dr alemannisch Sprochruum sälber, wie ne Matte voll mit Wildblueme, statt eme churzgstutzte änglische Wase: bi uns isch Viilfalt gwinscht.

Es derf also e jede in sym eigne Dialäkt Artikel verfasse. Bi regionali Theme sähn mir s gärn, wänn dr Artikel au im Dialäkt vu däre Gegnig gschribe isch. Unser Ziil isch es nit, alli Alemanne in e gmeinsami Standardsproch z zwänge, wu niemer als Müetersproch schwätzt.

Unser Ziil isch es au nit, e mögligst archaischs Alemannisch z schriibe, mr wänn uns neuere Entwicklige nit grundsätzlig in de Wäg wärfe. Abber mir wän s Bewusstsyy scherfe fir d Unterschid zwische Dialäkt, regionale Umgangssproche un dr Schriftsproch: e Gmisch vu Hochdütsch un Alemannisch lehne mr ab; wenn unseri Artiikel i'me-ne Hochdütsch mit e baar alemannische Wörter dinne gschribe wäre, no wär d'Bedriibig vu-n-ere alemannische Enzyklopedii sinnlos.


Di alemannisch Wikipedia isch hit di umfangrychscht Internetsyte uf Alemannisch. Unser Ziil isch s, dass si s grescht un wichtigscht Internetportal rund um alemannischi Dialäkt wird, e Orientierigspunkt fir alli, wu sich fir alemannischi Dialäkt inträssiere.


Eis vu unsre Ziil isch au d Sprochpfläg. Vor allem im Elsass un ganz bsundersch in dr italienische Walserderfer sin di alemannische Dialäkt hit stark gfehrdet un wäre allmeh vum Franzesisch bzw. vum Italienisch verdrängt. In dr Alemannische Wikipedia setze mir di alemannisch Sproch uf eme modärne Fäld yy un zeige dodermit, ass si au hite no ne Daug het, au we'mr wüsse, dass mr nit de Umfang vu de Wikipedie in de Wältsproche chönne erreiche. Mr versüeche einewääg, Artikel vu hocher Qualitet z schriibe, sodass de Läser ab un züe au moll bi uns lüegt, ob er interessanti Informatione findet. Mr wänn chönne ernscht gnuu were; gspäßigi, satiirischi odder umgangssprochligi Formulierige sin nit gwünscht. Villicht chenne mir e chleine Byydrag leischte, ass es Aasäh vum Alemannisch iberall dert ghobe wird, wu Dialäkt vu modärne Schriftsproche oder regionale Umgangssproche bedrängt wird.


De Umgangsdon zwüsche de Nutzer soll wu immer möglig frünndlig sii, persönligi Aagriff sin nit gwünscht. Kritiik a'me-ne Nutzer odder siner Arbet müeß uubedingt sachlig sii un devuu usgoh, dass es de ander güet gmeint hät. Persönligi Konflikt solle nit do usdrage were, sobal si nütt meh mit de Wikipedia z düe hänn.

Di alemannischi Wikipedia vereinigt au verschideni Regione un Länder uuabhängig vu de boliitische Gränze. E Spaltig zwüsche einzelne Regione odder Natione, de Sprächer vu verschidene Dialäkt odder Altersgruppe wä'mr nit – d'Wikipedia isch grundsätzlig für alli do, wu dezüe wänn biidrage. Au e Verfeindig gegenübber de dütschsprochige odder andere Wikipedie isch nit des, was mr wänn.