Pressemitteilig zum 5000. Artikel vu dr Alemannische Wikipedia

Di frej Online-Enzyklopedii Wikipedia fyrt dr 5000. Artikel vum alemannische Sprochprojäkt

Was im Septämber 2003 as elsässischi Wikipedia aagfange het, het sich zum greschte alemannischsprochige Nochschlagwärch entwicklet, wu Velker iber di hitige Amtssproche verbindet: Bade-Wirttebärger, Elsässer, Schwobe vu Bayern, Vorarlbärger, Liechtesteiner, Dytschschwyzer un Walser z Norditalie. Am 8.5.2009 het di Alemannisch Wikipedia jetz mit em Bytrag iber Hunspach dr 5000. Artikel erreicht.

S Online-Lexikon Wikipedia zellt syt e paar Johr zue dr beliebteschte Nochschlagwärch vu dr Wält. Näbe dr bekannte Versionen uf Änglisch, Dytsch un Franzesisch git s d Wikipedia in iber 250 andere Sproche, au eso exotische wie Tagalog oder Yoruba. Aber au Dialektliebhaber hän ihri Nische gfunde mit Usgabe in Bairisch, Plattdytsch oder Alemannisch.

Vu dr Elsässische zue dr Alemannische Wikipedia

Wu dr elsässisch Informatiker Alexis Dufrenoy im Septämber 2003 bi dr Wikimedia Foundation in dr USA aafrogt gha het, eb au megli wär, e Wikipedia uf Elsässisch aazlege, het e hitzigi Diskussion in dr Internet-Gmeinschaft aagfange: Brucht s jetz au nno ne Wikipedia in allne Dialäkt? Erscht wu sich dr Wikipedia-Grinder Jimmy Wales persenlig in die Diskussion yygschalte het un sich fir s Aalege uussproche het, isch dr Wäg frej gsi fir d "Elsässisch Wikipedia".

Im erschte Johr isch aber wenig gschäh in däre elsässische Internetenzyklopedii: dr Dufrenoy het mittlerwyli z Paris gschafft un het kei Zyt meh gha, Artikel uf Elsässisch z schrybe. Wel sich au kei andere Elsässer gfunde hän, wär di Elsässisch Wikipedia fascht wider yygschlofe. Jetz hän aber anderi Dialektfans des Projäkt entdeckt: dr "Chlämens" us em badische Rhyfälde, dr "Melancholie" us em bayrische Allgäu, dr "J. 'mach' Wust" vu Bern. Si hä vorgschla, die elsässisch Wikipedia uuszwyte zuen ere Enzyklopedii vu allne alemannische Dialäkt. Eso isch im Novämber 2004 us dr elsässische di "Alemannische Wikipedia" wore.

E alemannisch Enzyklopedii vum Wisse

Di chlei alemannisch Sprochabteilig vum große Internetlexikon het hite e ängere Chreis vu eppe zwanzg Autore, wu ständig oder hyfig aktiv sin, aber au Hunderti, wu sälte oder au nume eimol eppis schrybe oder gschribe hän. Mer findet in dr Alemannische Wikipedia Artikel uf Züritüütsch, uf Bärndütsch, uf Wallisertiitsch, uf Vorarlbergerisch, uf Markgräflerisch, uf Schwäbisch, uf Elsässisch. Sogar us em italienische Piemont het e Benutzer Artikel bytrait, gschribe im archaische Walserdialäkt vum chleine Derfli Alagna Valsesia.

Vil Artikel sin gschribe iber Themene us dr alemannischsprochige Regione, s het Byträg iber d Gschicht vum Elsiss, iber d Kaiserstuehl, iber dr Vierwaldstättersee un iber Alamannischi Reihegreberfälder. Wyteri Artikel berichte iber anderi Berych vum modärne Wisse, iber dr Albert Einstein un d Mond vum Planet Jupiter, iber dr Barack Obama, sälbscht dr Harry Potter un d Britney Spears hän eigeni Artikel.

Iber d Wikipedia

Wikipedia isch e freji Enzyklopedii, wu uusschließlig vu frejwillige Autore aagleit wore isch un als wyter gschribe wird. Alli Inhalt vu däm Online-Projäkt chenne vu jedem Internetnutzer verbesseret un ergänzt wäre. Si unterlige zuedäm ere freje Lizänz, wu jedem s choschtelos Rächt yyruumt, si z nutze, z verändere un z verbreite.

Links: Houptsyte: http://als.wikipedia.org
Profil: http://als.wikipedia.org/wiki/Wikipedia:Profil
Bsunders glungeni Artikel: http://als.wikipedia.org/wiki/Wikipedia:Bsunders_glungeni_Artikel
Portal Alemannisch: http://als.wikipedia.org/wiki/Portal:Alemannisch
Portal Alemanne: http://als.wikipedia.org/wiki/Portal:Alemanne

Iber d Wikimedia

Di international Non-Profit-Organisation Wikimedia het sich dr Sammlig un Verbreitig vu frejem Wisse verschribe. Dachorganisation un Betryberi vu dr Wikipedia isch d Wikimedia Foundation mit Sitz z Florida, USA, wu anne 2003 grindet wore isch. Syter em Juni 2004 git s au e dytschi Abteilig, dr gmeinnitzig Verein „Wikimedia Deutschland - Gesellschaft zur Förderung Freien Wissens e.V.“ mit Sitz z Berlin. D Wikimedia finanziert sich uusschließlig dur Spände un isch uuabhängig vu effentlige Ferdergälder.
Wikimedia Foundation Inc. - http://wikimediafoundation.org
Wikimedia Deutschland e.V. - http://www.wikimedia.de/

Kontakt

Fir Ruckfroge wände Si sich bitte per E-Mail an s Presseteam vu dr alemannischsprochige Wikipedia oder an die Aasprächpartner:
...