Presseerklärig zum 5000. Artikel vo dr Alemannische Wikipedia

Die freji Online-Enzyklopädi Wikipedia fiiret sin 5000. Artikel vom alemannische Sprochprojäkt

Was im September 2003 als elsässische Wikipedia agfange het, het sich zum gröschte alemannischsprochige (schwiizerdütsche) Lexikon entwicklet, wo Völker über die hütige Amtssproche drüberus verbindet: Dütschschwiizer, Liechtesteiner, Schwobe vo Bayern, Elsässer, Bade-Württeberger, Vorarlberger und Walser z Norditalie. Am 8.5.2009 het die Alemannisch Wikipedia jetze mit em Bitrag über Hunspach dr 5000. Artikel erreicht.

S Online-Lexikon Wikipedia zellt sit es paar Joor zu de beliebtischte Nochschlagwärk vo dr Welt. Näbe de bekannte Versione uff Änglisch, Dütsch und Französisch gitts d Wikipedia in über 250 witere Sproche, au exotischi wie Tagalog oder Yoruba. Aber au Liebhaber vom Dialäkt hän ihr Plätzli gfunde mit Usgabe uff z.B. Bairisch, Plattdütsch oder ebbe Alemannisch (wo au s'Schwiizerdütsch drzue ghört).

Vo dr Elsässische zur Alemannische Wikipedia

Wo dr elsässisch Informatiker Alexis Dufrenoy im September 2003 bi dr Wikimedia Foundation i de USA agfrogt het, obs au mögli wäri, e Wikipedia uf Elsässisch z'erstellen, hett e heissi Debatte i dr Internet-Gemeinschaft agfange: Bruchts jetze au no e Wikipedia in allne Dialäkt? Erst wo sich dr Wikipedia-Gründer Jimmy Wales persönlig in die Diskussion ygschaltet und sich für d Errichtig usgsproche het, isch dr Wäg frei gsi für die "Elsässisch Wikipedia".

Im erschte Joor isch aber wenig passiert in däre elsässische Internetenzyklopädie: Dr Dufrenoy het unterdesse z'Paris gschaffet und ke Zit gfunde, Artikel uf Elsässisch z'schriibe. Will sich au kei anderi Elsässer gfunde hän, hett dr elsässisch Wikipedia ihr Änd droht, bevor si richtig uff d Wält cho isch. Doch anderi Dialäktliebhaber hän das Projäggt entdeckt: Dr "Chlämens" us Badisch-Rhyfälde, dr "Melancholie" us em bayrische Allgäu und dr "J. 'mach' Wust" us Bärn. Sie hän vorgschlage, die elsässisch Wikipedia zunere Enyzklopädi vo allne alemannische Dialäkt z'erwitere. So isch im Novämber 2004 die alemannisch Wikipedia entstande.

E alemannischi Enzyklopädi vom Wüsse

Die chliini alemannischi Sprochsektion vom grosse Internetlexikon het hütte e ängere Kreis vo rund zwanzig Autore, wo ständig oder hüffig aktiv sin, aber au Hunderti, wo numme mängisch ode au nume eimoll öppis schriibe oder gschriibe hän. So findet me i dr Alemannische Wikipedia Artikel uff Züritüütsch, Bärndütsch, Wallisertiitsch, Vorarlbärgisch, Markgräflerisch, Schwäbisch, Elsässisch und andere mee. Sogar us em italiänische Piemont het en Benutzer Artikel gschriibe - im archaisch amuetende Walserdialäkt vom chliine Dörfli Im Land (Alagna Valsesia).

Vili Artikel widme sich Theme us de alemannischsproochige Regione, es git Biträg über d Gschicht vom Elsass, über dr Kaiserstuehl, übr dr Vierwaldstättersee und über Alemannischi Reihegräberfälder. Witeri Artikel brichte über anderi Bereich vom modärne Wüsse, über dr Albärt Einstein und d Mond vom Planet Jupiter, über dr Barack Obama, aber au dr Harry Potter und d Britney Spears sin mit eigne Artikel verträtte.

Über Wikipedia

D Wikipedia isch e freji Enzyklopädi, wo usschliesslig vo freiwillige Autore erstellt worde isch und ständig witergschriibe wird. Alli Inhalt vom Onlineprojäkt chönne vo jedem Internetnutzer verbesseret und ergänzt wärde. Si stöön zuedäm unter enere freie Lizänz, wo jedem koschtelos s Rächt zer Nutzig, Veränderig und Verbreitig git.

Links: Hauptsite: http://als.wikipedia.org
Profil: http://als.wikipedia.org/wiki/Wikipedia:Profil
Bsunders glungeni Artikel: http://als.wikipedia.org/wiki/Wikipedia:Bsunders_glungeni_Artikel
Portal Alemannisch: http://als.wikipedia.org/wiki/Portal:Alemannisch
Portal Alemannen: http://als.wikipedia.org/wiki/Portal:Alemanne

Über Wikimedia

Die internationali Non-Profit-Organisation Wikimedia het sich dr Sammlig und Verbreitig vom freie Wüsse verschriibe. Dachorganisation und Betriiberin vo dr Wikipedia isch d Wikimedia Foundation mit Sitz z'Florida i de USA, wo 2003 gründet worde isch. Sit em Mai 2006 gits au e Schwiizer Sektion, dr gmeinnützigi Verein "Wikimedia CH - Verein zur Förderung Freien Wissens" mit Sitz z Züri. Wikimedia finanziert sich nume dur Spände und isch unabhängig vo öffentliche Subventione.

Wikimedia Foundation Inc. - http://wikimediafoundation.org
Wikimedia Schweiz e.V. - http://www.wikimedia.ch/

Kontakt

Mit Ruckfrooge wände Sie sich bitte per E-Mail as Prässeteam vo dr alemannische Wikipedia oder an die folgende Asprächpartner:
...