Wänkehoof

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Wänkehoof mit Park
Dialäkt: Baseldütsch

Dr Wänkehoof isch e Grubbe vo historische Geböid an dr Bettigerstrooss 121 z Rieche. Dr Hoof isch äins vo de Kulturgüeter im Kanton Baasel-Stadt, wo nazionali Bedütig häi.

Gschicht[ändere | Quälltäxt bearbeite]

Dr Wänke isch in ere Urkunde vo 751 zum erste Mol bezügt. Noch em Bluetgricht z Cannstatt im Joor 746, wo d Franke dr alemannisch Aadel entmachdet häi, häi vili vo de alemannische Grundbsitzer Angst gha, vo de Franke entäignet z wärde. Was si denn gmacht häi, isch Ländereie eme Chloster z schängge, aber nume as Prekarie, d. h. ass dä, wo s Land dr Chille schänggt, das vo iire as Leeche wider zruggbechunnt. Eso isch s vor ere Entäignig sicher gsi. Das isch was dr Ebo und si Frau Odalsinda gmacht häi; und sälli Schänkigsurkunde isch die ersti Erwäänig vom Wänke.[1]

1714 het dr Christoph Burckhardt-Merian dr Guetshoof kauft und vergrösseret. 1735 het dr Handelsherr Johannes Zaeslin s Gländ vor em Wänkehoof kauft und sich dört e representative äistöckige Summersitz noch französische Vorbilder lo baue, vermuetlig vom Johann Carl Hemeling us Karlsrue. Noch em Zäeslin sim Dood het mä dr Wänkehoof nume für gsellschaftligi Aalässe brucht, wil s din weder e Chuchi no Schloofzimmer gha het. 1860 het dr Baasler Archidekt Johann Jakob Stehlin dr Jünger es in e Woonhuus mit eme zwäite Stock umbaut.

1870 het dr Martin Burckhardt-Burckhardt dr Nöi Wänke mit em Gaarde gerbt. 1917 häi en dr Industriell Alexander Clavel-Respinger und si Frau Fanny im Eduard Buurged sinere Witwe abkauft. 1931 het dr Clavel no s alte Hoofguet drzuekauft und dr Park gege Oste erwiteret. Dr Nöi Wänke isch zwüsche de Joor 1917 und 1954 usbaut worde und mä het im Stehlin si Umbau em barocke Stiil vom Bardeer aabasst. 1925 het dr Clavel e Rithalle lo baue und am Iigang zum Eerehoof zwäi monumentali Hirschblastike lo ufstelle und e Gitterdoor.

1932 häi d Clavels dr Alt Wänkehoof dr Iiwoonergmäind vo dr Stadt Baasel gschänggt, und die het d Geböid under Dänggmolschutz lo stelle. Dr Landschaftspark ghöört hüte dr Gmäind Rieche und isch offe für s Publikum. Dr Nöi Wänkehoof mit em französische Garte ghöört dr Alexander Clavel-Stifdig, wo 1954 gründet worde isch und under dr Ufsicht vom Baasler Regierigsroot stoot. S Geböid cha für Aalääss gmietet wärde.[2]

Fuessnoote[ändere | Quälltäxt bearbeite]

  1. Hier wohnt der Mensch 1250 Jahre Wenkenhof riehener-jahrbuch.ch (2001), abgrüeft am 22. Merz 2015
  2. Historisches uf de Website vom Wänkehoof, abgrüeft am 22. Merz 2015

47.5748777777787.6528888888889Koordinaten: 47° 34′ 29,6″ N, 7° 39′ 10,4″ O; CH1903: 616122 / 269375