Die Wissi Armee

As Wissi Armee (russisch Белая армия; im Original: Бѣлая армія), au Wissi Garde (russisch Белая гвардия), bezäichnet mä d Drubbe vo dr russische Wisse Beweegig, wo im Russische Bürgerchrieg (1918–1922) gege die Rooti Armee kämpft het, Die Wissi Armee isch us dr antibolschewikische Freiwilligenarmee entstande.

En Antibolschewistischs Blakaat vo dr Wisse Armee, wo d Lüt drzue ufrüeft, sich freiwillig z mälde.

Die Wisse, wo dr politisch Arm vo dr Wisse Armee gsi si, häi sich uf seer underschidligi Chreft vo dr russische Gsellschaft gstützt, wo alli iiri äignige Vorstellige über d Methode, d Richdig und d Ziil vom Kampf gege Sowjetrussland gha häi. Eso si weder die Wissi Beweegig no die Wissi Armee je en veräinti politischi bzw. milidäärischi Chraft gsi, sondern si immer nume en eender luggi Veräinigung vo verschidnige Grubbierigen bliibe, und s äinzige wo sä veräint het, isch gsi, ass si alli gege d Bolschewiki gsi si. Si häi immer wider mit intärne Allianze, wo vo de Mächt vo dr Entente und andere siigriiche Staate im Erste Wältchrieg understützt worde si, brobiert, d Bolschewike z besiige, am beste ooni Partner, zum eso iiri spezifische Vorstellige über d Noochchriegsornig umzsetze. Vor allem häi si kä Brogramm gha, wo politischi und soziali Reforme vorgsee hätt, was vom ene groosse Däil vo dr russische Bevölkerig gwünscht worde isch. Die Wisse und iiri Armeä häi dorum nie d Masse vo dr Bevölkerig uf iiri Site chönne zie.

Noch Joor vo nutzloose Kämpf het dr General Pjotr Wrangel im April 1920 dr Ooberbefääl übernoo. Er het brobiert in de wenige Gebiet in Südrussland und uf dr Krim, wo no under sinere Macht gsi si, e demokratisch legitimierte Staat z gründe. Für das isch s aber scho z spoot gsi und im Novämber 1920 si letschte Drubbe vo de Wisse vo dr Halbinsle Krim verdriibe worde.

Dr Grigorij Semjonow und dr Michail Diterichs häi im Färne Oste mit dr Understützig vo japanische Drubbe brobiert, en äigeständige Staat z gründe. Ändi Oktober 1922 isch Wladiwostok gfalle und dr Russisch Bürgerchrieg isch offiziell ume gsi.

Liddratuur

• Владимир Черкасов-Георгиевский: Вожди белых армий. Русич, Смоленск 2003, ISBN 5-8138-0131-6.
• Семен Спиридонович Хромов: Гражданская война и военная интервенция в СССР. Сов. энцикл., Москва 1987.
• Encyclopedia Judaica. Bd. 14, S. 433–506.
• Karmann, Rudolf: Der Freiheitskampf der Kosaken. Die weiße Armee in der russischen Revolution 1917 - 1920. Puchheim 1985, Idea
• Nikolaus Katzer: Die Weiße Bewegung in Russland. Herrschaftsbildung, praktische Politik und politische Programmatik im Bürgerkrieg (= Beiträge zur Geschichte Osteuropas. Bd. 28). Böhlau, Köln u. a. 1999, ISBN 3-412-11698-X (Zugleich: Bonn, Universität, Habilitations-Schrift, 1996).

Dä Artikel basiert uff ere fräie Übersetzig vum Artikel „Weiße_Armee“ vu de dütsche Wikipedia. E Liste vu de Autore un Versione isch do z finde.