Vincent Novello

Us der alemannische Wikipedia, der freie Dialäkt-Enzyklopedy
Dr Vincent Novello

Dr Vincent Novello (* 6. Septämber 1781 z London; † 9. August 1861 z Nizza) isch en änglische Musiker und Muusigverleeger gsi.

Lääbe[ändere | Quälltäxt bearbeite]

Dr Novello isch e Soon vom ene Italiäner und ere Ängländere gsi. As Bueb het er im Chor vo dr Sardinian Chapel in dr Duke Street, Lincoln’s Inn Fields gsunge und au gleert, Orgle spiile. Vo 1796 bis 1822 isch er zerst Organist an ere Chille am Manchester Square gsi, denn am Grosvenor Square und vo 1840 bis 1843 an dr St Mary Moorfields. Er het d Philharmonic Society mitgründet, d Classical Harmonists und d Choral Harmonists und het vilmol as Dirigänt gschafft. 1849 isch er z Nizza in d Bangsioon gange.

Wärk[ändere | Quälltäxt bearbeite]

Dr Novello het e Hufe gäistligi Wärk komponiert, vor allem aber het er umbekannti Wärk vo groosse Komponiste z Ängland bekannt gmacht. D Mässe vom Haydn und vom Mozart si z Ängland vollkomme umbekannt gsi, bevor er si ediert het, wie au d Wärk vom Palestrina.

Sis erste Wärk isch e Sammlig vo gäistliger Muusig gsi, wie si an dr Royal Portuguese Chapel ufgfüert worde isch, und mit däm het er e Muusigverlaag ufdoo. 1829 het si Soon Joseph Alfred Novello (1810–1896) der Verlaag übernoo und het aagfange Nooteusgoobe z veröffentlige, wo sich d Lüt häi chönne läiste. Vo 1841 aa het dr Henry Littleton im Verlaag gschafft und isch 1861 Partner worde und vo denn aa het d Firma "Novello & Co." ghäisse. Wo dr J.A. Novello in Bangsioon gange isch, het dr Littleton dr Verlaag witergfüert.

Familie[ändere | Quälltäxt bearbeite]

Usser em Joseph Alfred het dr Vincent Novello non e baar Chinder ghaa. Vier vo sine Döchder si begabti Sängere gsi. Die berüemtisti von ene isch d Clara Novello (1818–1908), won e schööni, hoochi Sopranstimm ghaa het und vo 1833 a in Opere, Oratorie und uf dr Konzärtbüüni ufdräte isch. Die jüngst Dochder, d Mary, het dr Charles Cowden Clarke ghürootet.

Dä Artikel basiert uff ere fräie Übersetzig vum Artikel „Vincent_Novello“ vu de dütsche Wikipedia. E Liste vu de Autore un Versione isch do z finde.