Laugeli

Laugeli (Alburnus alburnus)

Systematik

Ordnig:	Charpfenartigi (Cypriniformes)
Familie:	Charpfefisch (Cyprinidae)
Underfamilie:	Alburninae
Gattig:	Alburnus
Art:	Laugeli

Wüsseschaftlige Name

Alburnus alburnus

Linnaeus, 1758

S Laugeli (Alburnus alburnus; alemanischi Näme) isch e chliine europäische Schwarmfisch wo Stillgwässer oder langsami Flüüssgwässer bivorzugt. Wells recht empfindli uf Wasserverschmutzig reagiert, ghörts zo de bidroote Fisch, obwoll s recht verbraitet isch.

Uussie

S Laugeli isch e schmaale dünne Fisch mitere silbrige Farb und emene Grüeschimmer ufem Rugge. S werd 16 bis 20 cm lang und wögt öppe 60 Gramm.

Verbraitig

S Laugeli chunnt i ganz Europa vor, usser ganz im Noorde und im Mittelmeerruum. S lebt i subere, klare Gwässer wo kai oder nu e schwachi Ströömig hend.

Lebeswiis

S Laugeli schwümmt nu wenig under de Wasserobeflächi i flache pflanzefraie Uuferzoone. Zum Insekte foo, gumptes usem Wasser und s fresst au Plankton und Insektelaarfe. S Laugeli werd vo Raubfisch, bsunders vom Zander oder Egli gjagt.

D Laichzitt goot vom Märze bis in Juni, sobald d Wassertemperatur öber 12 Grad stiigt. S Wiibli lait 5'000 bis 10'000 Aier uf e subere chiisige oder stainige Grund ab. D Laarfe lebet i Uufernööchi. Im dritte Joor sind Laugeli uusgwachse und wered maximal sibe Joor alt.

Büecher

Stefan Ineichen (Hrsg.): Stadtfaune, 600 Tierarten der Stadt Zürich; Bern 2010; ISBN 978-3-258-07561-7

Weblinks

Commons: Laugeli – Sammlig vo Multimediadateie

Laube (Fisch) uf Fishbase.org (englisch)