Tulinger

D Tulinger sind en Stamm gsii, wo zäme mit de Helvetier im Joor 58 v. Chr. iri Sitz verloo hend und noch Südgallie is Piet vo de Santone hend wöle uuswandere. Am Uuszug hend 36 Tuusig Tulinger tailgnoo und si hend sich dur iri Chriegstüchtigkait uuszaichnet.

Diskussion

D Woonsitz vo de Tulinger sind nöd bikannt, früener het mer si wöle im Wallis lokalisiere, well de Dichter Avienus Tylangier a de Rhone erwähnt het. Wege de Endig uf -ing werd au dröber diskutiert, öb si eventuell nöd Kelte sondern Germane gsii sind, wo i de Alpe gwont hend. Doch werd hüt vo de Forschig d Existenz vo Alpegermane nöme anerchennt.