Thomas Piketty

Dr Thomas Piketty (2014)

Dr Thomas Piketty (* 7. Mai 1971 z Clichy) isch e franzöösische Wirtschaftswüsseschaftler und Brofässer an dr Paris School of Economics und dr École des hautes études en sciences sociales.

2014 isch die änglischi Übersetzig Capital in the Twenty-First Century vo sim franzöösische Buech vo 2013 Le Capital au XXIe siècle uusechoo und het uf dr ganze Wält und vor allem in de USA für seer groossi Ufmerksamkäit gsorgt.

Karriere

Dr Piketty het mit achzääni an dr École normale supérieure (ENS) Ökonomii afo studiere. Mit zwäiäzwanzgi het er mit ere Arbet über d Umverdäilig, won er an dr ENS und dr London School of Economics gschriibe het, bromowiert. Vo 1993 bis 1995 het er am Massachusetts Institute of Technology underrichdet. 1995 isch er Mitgliid vom Centre national de la recherche scientifique (CNRS) worde und 2000 Diräkter vo dr École des hautes études en sciences sociales (EHESS).

Im Waalkampf zur Bredidäntschaft vo Frankriich im Joor 2007 isch dr Piketty dr wirtschaftspolitisch Berooter vo dr sozialistische Kandidatin Segolene Royal gsi, wo schliesslig mit 46,94 Brozänt vo de Stimme gegen dr konservativ Nicolas Sarkozy verloore het. 2012 het er d Waal vom Sozialist François Hollande understützt.

Allgemäin bekannt worde isch dr Piketty 2014 mit dr änglische Usgoob vo sim Wärk, Capital in the Twenty-First Century, wo nid nume in de Fachkräis sondern au in de allgemäine Medie für e Buech über Ökonomii ussergwöönlig vil diskutiert wird.

Forschig

Dr Piketty forscht bsundrigs zu de Theme Verdäilig vo de Iikomme, Verdäilig vom Vermööge und soziali Ungliichhäit. Noch dr FAZ dänggi er, ass d Wirtschaftswüsseschaft as Sozialwüsseschaft mit reale Daate reali Broblerm sött sueche und sogar löösen. Si Aasatz sig e sozialdemokratisch-popperianischi Anthropologii vom Kapital.

Iikomme

Er het joorelang mit Kollege, bsundrigs mit em Anthony Atkinson und em Emmanuel Saez zur Verdäilig vom Iikomme gforscht und zäigt, ass in de westlige Industrienazioone zwüsche de 1940er und 1970er Joor die ökonomischi Ungliichhäit zruggange isch, sithäär aber wider gwaggse isch.

Dr Piketty het d Iikommensstüüre undersuecht und gfunde, ass in Frankriich noch em Zwäite Wältchrieg d d Iikomme sich enander aagliche häi, wil in dere Faase d Progression vo de Stüüre z Frankriich gwaggse isch.

Ass d Underschiid in de Iikomme noch de 1970er Joor wider gwaggse si, erklääri zum Däil au d Finanzkriise vo 2007 aa, wil wenn d Finanzbransche z stark waggsi, d Gwinn, wo vo de Vermööge gmacht wurde, vor allem de Riichste zguetchääme und eso d Underschiid zwüsche de Iikomme gröösser wurde.

D Daate vom Piketty und sine Kollege zur Verdäilig vo de Iikomme und bsundrigs zu de Top-Vermööge in verschiidene Länder si in d Daatebank World Top Income Database gflosse, wo sit 2011 onläin isch.

Vermööge

Im Capital in the Twenty-First Century het dr Piketty sini historische Forschige zur Verdäilig vo de Iikomme und vo de Vermööge mit ere Theorii vom Kapitalismus verbunde. Er argumentiert, ass en unregulierte Kapitalismus drzue müess füere, ass d Vermööge in wenige Händ konzentriert wurde und dass wäge däm d Wirtschaft aafieng afo stagniere, was d Demokratii in Gfoor wurd bringe.

Sobald d Iikümft us Kapital („r“) gröösser sige as s Wirtschaftswachsdum („g“), also „r > g“, fieng die Entwigglig aa. In dr Gschicht sig r mäistens gröösser gsi as g, im 19. Joorhundert sig denn zum erste Mol g > r gsi. Allerdings häige am Ändi vom 19. Joorhundert bis zur Zit vom Erste Wältchrieg d Iikümft us Kapital im Vergliich zum Waggsdum vo dr Wirtschaft stark zuegnoo. Dr groosse Ungliichhäit in dere Zit, wo in Öiropa Belle Epoque und in de USA Gilded Age ghäisse häi, häig denn dr Erst Wältchrieg e vorlöifigs Änd gmacht. Dr Chrieg und denn die Great Depression und dr Zwäit Wältchrieg häige d Konzentrazioon vo de Vermööge verchliineret und eso isch s Waggsdum vo dr Wirtschaft gröösser as d Iikümft us Kapital worde: (g > r). Die Entwigglig häig gege s Ändi vom 20. Joorhundert ufghöört.

Uszäichnige

• 2013: Yrjö-Jahnsson-Briis
• 2002: Prix du meilleur jeune économiste de France

Wärk

Büecher

Uf Franzöösisch

• 2013: Le Capital au XXIe siècle. Le Seuil, Paris, ISBN 978-2-021-08228-9 (die änglischi Übersetzig isch im Merz 2014 erschiine)
• 2011: mit dr Camille Landais und em Emmanuel Saez: Pour une Révolution Fiscale. Un Impôt sur le Revenu pour le XXIème Siècle. Le Seuil, ISBN 2-02-103941-2 Materialien)
• 2008: L’économie des inégalités. Découverte, Bariis, ISBN 2-7071-5608-6
• 2006: Les hauts revenus en France au XXe siècle. Intégralités et redistributions, 1901–1998. Hachette, Bariis 2006, ISBN 2-01-279292-8
• 1999: Introduction a la theorie de la redistribution des richesses. Economica, Bariis 1999, ISBN 2-7178-2653-X

Uf Änglisch

• 2014: Capital in the Twenty-First Century. Harvard University Press, Cambridge, ISBN 978-0-674-43000-6 (Übersetzig vom Le Capital au XXIe siècle; Zusammenfassung: Inequality & Capitalism in the Long Run, Material)
• 2010: mit em Anthony Atkinson: Top Incomes. A Global Perspective. Oxford University Press, Oxford
• 2007: mit em Anthony Atkinson: Top Incomes Over the Twentieth Century. A Contrast Between European and English-Speaking Countries. Oxford University Press, Oxford, ISBN 0-19-928688-4

Wichdigi Fachufsetz

• 2014: mit em Emmanuel Saez und dr Stefanie Stantcheva: Optimal taxation of top labor incomes: a tale of three elasticites, American economic journal: economic policy, vol.6, n.1, 2014, S. 230-271.
• 2013: mit em Facundo Alvaredo, Anthony Atkinson und Emmanuel Saz: The top 1% in international and historical perspective, Journal of economic perspectives, vol.27, n.3, 2013, S.1-21.
• 2011: mit em Anthony Atkinson und Emmanuel Saez: Top Incomes in the Long Run of History. In: Journal of Economic Literature. Band 49, Nr. 1, S. 3–71.

Wichdigi Zitigsardikel

• Globale Ungleichheit: Weshalb wir eine globale Vermögenssteuer brauchen. En Ardikel vom Piketty in Internationale Politik und Gesellschaft, 22. April 2014.
  • Originalardikel: Save capitalism from the capitalists by taxing wealth, in: Financial Times, 29. März 2014,
• Taxing the 1%: Why the top tax rate could be over 80%, mit em Emmanuel Saez und dr Stefanie Stantcheva, in: Vox, 8. Dezämber 2011
• This house believes that the rich should pay higher taxes - Opening statement, Rebuttal statement Closing statement, in: The Economist, 7., 10. und 15. April 2009

Weblingg

• Offizielli Website vom Pikettz mit vile Vollteggst und Daatematerial
• Onläin-Daatebank: The World Top Income Database. Facundo Alvaredo, Anthony Atkinson, Thomas Piketty, Emmanuel Saez (Hrsg.), abgrüeft am 27. April 2014.

Ardikel über e Piketty

• Nils Minkmar: Zu Besuch bei Thomas Piketty. Der neue Star der Intellektuellenszene, FAZ, 08. Mai 2014
• Bastian Brinkmann: Ungleichheitsforscher Piketty: Das Kapital ist zurück; Interwiuu in dr Süddütsche Zitig, 27. März 2014
• Andrea Dernbach: Kapitalismus-Kritiker Thomas Piketty: „So wie jetzt kann Kapitalismus nicht funktionieren“. In: Tagesspiegel. 21. April 2014. 

Fuessnoote

Dä Artikel basiert uff ere fräie Übersetzig vum Artikel „Thomas_Piketty“ vu de dütsche Wikipedia. E Liste vu de Autore un Versione isch do z finde.