Theater im Düüfelhof

Dialäkt: Baseldütsch

S Theater im Düüfelhof isch e Chläibühni am Lienerdsgraabe 49 in dr Schwizer Stadt Basel.

Gschicht

S Theater im Düüfelhof isch us em «Schiefe Theater» uusegwachse, wo dr Dominique Thommy (eigetlig Thomas Vogt) zämme mit em Albert leVice 1967 as ersts fahrbars Chläitheater gründet het. Säll isch e Konstruktion uf Reeder gsi, wo mä het chönne usenanderklappe und denn e schallisolierte, gschlossnige Theaterruum für 120 Zueschauer komplett mit Bühni worden isch. 1968 isch d Bremiäre gsii und denn si si z Viert, d Monica und dr Dominique Thommy-Kneschaurek und dr Albert leVice und si Frau, siibe Johr lang in ganz Europa umegräist und häi meh as 1'100 Vorstellige gee vor über 90'000 Zueschauer.

Wo si sich häi welle sässhaft mache, häi si z Basel e Restorant bedriibe, für zum ihr Theater z subvenzioniere. Däm häi si «Theater/Café zum Teufel» gsäit. 1989 isch do drus s Kultur- und Gasthuus «Der Teufelhof» worde, wo, wie d Gastgäber sääge, ‹Gastronomii, Hotellerii, Theater und Kunst under eim Dach› dehäi si.

S Theater

S Theater het hundert Sitzblätz und e drissig Kwadratmeter groossi Bühni. S Brogramm bestoht vor allem us Satiire- und Kabarettvorstellige.

Es git e «Verein Theater im Teufelhof», wo d Ufgoob von em isch, kulturelli Aaläss vo alle mööglige Arte duurezfüehre, wo mit em "Düüfelhof" verbunde si.

Uszeichnige

• 2001 Dr Kulturbriis vo dr Stadt Basel für e Laiter vom Theater im Düüfelhof, dr Fredy Heller
• 2004 Dr Markgräfler Gutedelbriis für d Monica Thommy-Kneschaurek und dr Dominique Thommy

Weblingg

• Regierungsrat - Medienmitteilung vom 13.11.2001: «Der Kulturpreis geht an Fredy Heller»
• S Theater im Düüfelhof