Text:Otto Sutermeister/Für d’Chinderstube/Morgenlieder

Morgenlieder.
1

I bi do die ganzi Nacht
I mim Bettli inne glege,
Der lieb Gott het by mer gwacht
Mit sim treie Schutz und Sege
Und jetz wach i uff und sag:
Guete Tag!

D’Vegel tiend ihr Morgelied
Dussen uf de Bäime singe.
Nai, si werde niene mied,
Nai, wie hell die Stimmli klinge!
’S isch mer ganz, i kennt si jo
Schier verstoh.

Liebe Gott, i au, i sing,
Will mi in dym Lob ergetze;
Mit mym Kinderstimmli bring
I mi Morgeliedli jetze.
Herr, i bring, nimm’s gnädig a,
Was i ka.

Lueg, wie scheen, wie herlig isch
D’Sunne iber d’Welt uffgange!
Siechsch am Berg dert d’Bäim und d’Bisch
Wien in Gold und Flamme prange?
Jo, vom Himel strahlt mit Macht
Gottes Pracht.

Lege mi doch jetzen a,
Bringe mir jetz myni Klaidli,
Daß i ume springe ka;
I will uffstoh waidli, waidli
Und au uff die langi Rueh
Eppis tue.

Liebe Gott, syg by dym Kind
Hitt uff alle syne Schritte,
Warn’s vor jeder schlimme Sind,
Stergg’s und mach’s recht folgsam hitte,
Daß mit Danggen i dä Tag
Schließe mag.

Abel Burkhardt (Basel).

2

Guet Tag, mys Chind, i grüeße di!
Ich darfschde wider wachber sy.
Wie heschde Bäckli rund und rot!
So chunnt es, wemm me schloofe goht
Zur rechte Zyt
Und rüihig lyt!

Guet Tag, mys Chind, wie heiter bisch!
Wie heschde Äugli gsund und frisch!
Chumm jetze gleitig uf my Arm;
Do isch dys Röckli, neu und warm.
Chumm uf my Schooß,
Mach groß, groß groß!

Guet Tag, mys Chind, Gott bhüeti di
Geng Tag u Nacht vor Leideli.
O blyb mer gsund und wird mer groß
Und gimm mer nie kei Meisterlos!
Mys Engeli,
Wie freusch de mi!

J. Hofstätter (Solothurn).

• • •