Text:Otto Keller/Schnitz ond Zwetschga!/Uf d’r Poscht

Uf d’r Poscht.

A Bauraweible kommt uf d’ Poscht
Ond frogt, was a Paketle koscht,
’s isch groß ond au a bisle schwer,
So gibt se ’s dem Beamta her.
Der wiegt glei des Paketle g’nau
Ond secht no zu der Baurafrau:
„So koscht ’s zwoi Mark, es isch halt schwer,
Drom ganget er am beschta her,
Ond machet zwoi Paketla draus,
Des macht am Porto viel glei aus!“
„Ha,“ secht des Bauraweible no,
„I woiß net, wia-n-e dees soll do,
Vielleicht, daß ihr mir ’s kennet sa:
’s isch drenn a Ziahharmonika!“