Text:Otto Keller/Schnitz ond Zwetschga!/Truppaschau

Us der alemannische Wikipedia, der freie Dialäkt-Enzyklopedy

Truppaschau.

Es schpielet Kender uf d’r Gaß
Ond deant brav exerziera,
Mit Fahna, Säbel, Helm ond Gwehr
Sieht mer se rom marschiera.
Uf oimol schreit a kloiner Knirps,
– Ond regt sich uf net wenig, –
„Jetzt gucket no, do honta kommt,
Wahrhaftig onser Kenig!“ –
D’r „Hauptma“ hot sich z’ erschta gfaßt,
Er hat sei Sach verschtanda,
Ond kommandiert mit heller Schtemm,
Laut: „Achtong! Schtill geschtanda!“
D’r Kenig kommt scho näher her,
Da schallt gar schneidig wieder
’s Kommando: „Präsentiert ’s Gewehr,“
Ond d’ Fahna senkt sich nieder. – –
Ond onser Kenig ziagt sein Huat,
– I han bloß gucka miaßa, –
So diaf, – sei Olgaregiment
Kann er net scheener griaßa!