Text:Otto Keller/Schnitz ond Zwetschga!/Kopf hoch!

Us der alemannische Wikipedia, der freie Dialäkt-Enzyklopedy

Kopf hoch!

Wenn ’s dann ond wann au wetterleichtet,
Ond ’s blitzt ond donnert schrecklich drei,
Kopf hoch, au noch em ärgschta Gwitter,
Kommt emmer wieder Sonnaschei! –
So goht ’s au oft em Menschaleba:
Wenn neamerts an a Wetter denkt,
Do blitzt ’s ond kracht ’s, wenn oim der Hemmel
Hot grad no voller Geiga g’hengt.
Leicht isch mer muatlos ond verschrocka
Beim erschta Blitz- ond Donnerschlag;
Doch om so heller scheint no d’ Sonna
Em Menschaherz am andra Dag.
Verdonklat no so schwarze Wolka
Dein Schicksalshemmel, – gib de drei,
Kopf hoch! Au noch em ärgschta Gwitter
Kommt emmer wieder Sonnaschei!