Text:Otto Keller/Schnitz ond Zwetschga!/Aus de Feria z’rick

Aus de Feria z’rick.

’s ischt schee en de Feria, des isch koi Frog,
Wenn mer so erholt sich von Arbet ond Plog,
Mer sieht do manch Plätzle, des so gut oim g’fällt.
Mer moint, ’s gäb koi scheeners meh leicht uf d’r Welt. –
Doch wieder d’rhoimda em häuslicha Krois,
Mer d’ Hoimet uf ’s neie erscht z’ schätza recht woiß,
Ischt ’s no so schee drauße, – a Schtemm secht en oim:
Am schenschta isch d’Hoimet – d’rhoim isch d’rhoim!