Text:Michel Buck/Bagenga/A Trom

Link zuefiege
Us der alemannische Wikipedia, der freie Dialäkt-Enzyklopedy

[119]
A Trom.

Verganga’n[1] isch mers au a môl
Ganz bsonder nadli[2] wôara,
Hau’ gmoint, ma’ müaß mer gar am End
Gauh’ noh da Dippel boahra.[3]

I denk: „jetz gohscht in d Kamer nei’
Und thuascht a bitzle schwitza,
Kassei’[4] des nimmt der deini Tröm
Und deini Fiabarhitza.“

Pflumpf lieg i in de Pfulba[5] dinn,
Fang ana’ fantasiara
Und mit meim Weib reachtschaffa au
Glei ana’ dischpatiara.

[120] Was gschieht? Dô kommt a Goischt derhear
Und sait, jetz seini gstôrba.
„Wa?“ sag i, „wa, bigoppel, wa?“
Und hau’ me ganz verfôrba.[6]

„Jô gstôrba bischt“, sait ear, „jetz komm
Nu’ ra mit deini Rufa[7]
Ins Feagfuir, watt, dô putzt ma’ de
Im Hafa mit de Glufa!“[8]

Dô mach i s Kreuz, und hui und pfui
Gôhts kezagrad in Boda,
I pflätsch[9] füars Feagfuirthäarli na’
Aß wia a nasser Loda.[10]

Zaischt[11] gsieh und ghair und gspeir[12] i nuinz,
I schmeck nu’ Peach und Schweabal,
Zletscht merk i so dur d Augaspält
En dicka Rauh und Neabal.

[121] Nôch wiani meini Auhra spitz,
Dô hair i grousig schreia,
Voar Angscht und Schrecka beat i rum
In älli Letaneia.

Pfuh, wia’n as houat, praschlat, schnällt[13],
Wia s wôdla[14] thuat und glüaha,
Aß thät der Obertuixel seall
Da graußa Blôsbalg ziaha!

Und ab deam Dummel[15] faß i ui
A so a grauß Vertsitza[16],
Daß i beim healla Feagfuir da’
Hau’ einskalt müaßa schwitza.

Der Goischt, dear reißt dô s Thäarli ouf –
Huh ! d Flamma lället[17] ousi –
Und geit mer nôch en Putsch[18] uffs Gsäß,
Ins Feagfuir eini douß[19] i.

[122] Dô kommt a alti Schachtel hear
Mit iahram blôa Zinka[20]
Und mit ra schwaza Gimpahoub[21]
Und thuat mer froindli winka

Und sait zua miar: „He, guatar Froind
Mit uiram zwilchna Schägga,[22]
I kenn ui wohl,“ und geit mer d Hand.
Dô hau’n i müaßa blägga.[23]

Druff nimm i s Heaz in boidi Händ
Und sag ge deanar Zusel:[24]
„S sind gwis noh maih von eusam Oat[25]
Dôhinna'n in deam Gwusel.“

„O“, sait se, „dô sind freili vill,
Doch maih noh weiter dunta,
Dött hau’n i etli Hearra gar
Von boid Kollegi funda,

[123] Da Bau’wat[26] und da Pollazei
Und suscht noh so Galluri[27].
Er seahnets glei dô vonna gauh’
Dur d Ei’sagätter duri.“

Druff sag i: „Weib, ja däaff ma’ dô
Nu’ auh’ Verlaubtniß laufa?
Hau’ gmoint, dô komm a jeder glei
Füar d richtig Fuatarraufa.“

„O“, sait se, watet nu’ a weng,
As däaff Ui gar it blanga[28]
Er kommet au gauh’ glei ans Britt,
Nôch wead mens s Weattar sanga![29]

Mi schüttlats, was as schüttla ka’
Doch d Zusel füahrt me weiter.
Dô hair i heina ällaweil,
Wia näher s gôht, wia läuter.

Uff oi’ môl stauh’t mer ama Loch,
Dô zoigt se na und deutat,
Dô hau’t dia Teixel grad en Ma’
Frei abanander gscheitat,[30]

[124] Mit Schrautäxt,[31] Speigel,[32] Schlegel druff
Halt zum Verbarma gschlaga.
Und woni guck, wear isch as gsei’?
Halt, Moul, da’ däasch it saga!

I frôg dô, weaga was se denn
Dea Ma’ so grousig spaltet.
Sait sui: „so macht ma’s deani äll,
Wo d Wäld so guat verwaltet.

Seahnt, dött versäagat ma’ grad au
En Obma’ noh zua Schwella,
Ma’ hait a bis zum Himmel nouf
Voar louter Schmeaza brölla.

Mit Oicha, Stanga, Scheiterholz,
Mit ällam hôt er ghandlat.
Doch s Haltel[33] isch äll gstohla gsei’,
Drum wead er so behandlat.“

Dô renn i gegem Feagfuirthoar
Und moi’, i könn vertrinna,[34]
Hoppla, dô lieg i au’verdanks[35]
Im Glufahafa dinna.

[125] I schrei, was uß der Gurgel ka’,
Hau’ sieba Gäng versprocha,
Dô thuats en Schnall und druff en Fall,
Höb[36] d Höll sei zema brocha.

Vor Schrecka sperr i d Auga’n ouf,
Dô siehni s Mulba[37] ranga,[38]
Und wo se nôch der Staub verzuiht,
Mei’ Häs am Nagel hanga.

„Ai“, sag i, „ai, dô schla doch glei
A’n Esel drei’, a lahmer,
Jetz hôts mer älles nu’ so tromt,
Du leischt jô in der Kamer.“

Und woni hofreacht[39] ummi guck,
Verstand i au des Kracha,
Mei’ Bettschet[40] ischt jô zema keit[41] -
Dô hau’n i müaßa lacha!

--- <references>

  1. ↑ Jüngst.
  2. ↑ Sonderbar.
  3. ↑ Das blöde Hirn öffnen.
  4. ↑ Kann sein, vielleicht.
  5. ↑ Kissen
  6. ↑ Verfärbt.
  7. ↑ Unreinigkeiten der Haut.
  8. ↑ Stecknadeln.
  9. ↑ Schlage.
  10. ↑ Aufgerolltes Tuchstück.
  11. ↑ Zuerst.
  12. ↑ Spüre
  13. ↑ Knallt.
  14. ↑ Wallen.
  15. ↑ Taumel, Lärm.
  16. ↑ Entsetzen.
  17. ↑ Züngeln.
  18. ↑ Schlag.
  19. ↑ Taumle.
  20. ↑ Nase.
  21. ↑ Radhaube.
  22. ↑ Langen Rock.
  23. ↑ Heulen.
  24. ↑ Ursprünglich Susanna.
  25. ↑ Ort.
  26. ↑ Flurschütz.
  27. ↑ Kerle.
  28. ↑ Verlangen.
  29. ↑ Dann wird man Ihm das Wetter segnen.
  30. ↑ Gespalten.
  31. ↑ Schroten = spalten.
  32. ↑ Keilen.
  33. ↑ Halbteil.
  34. ↑ Entrinnen.
  35. ↑ Unversehens.
  36. ↑ Als ob.
  37. ↑ Flaumfederstaub.
  38. ↑ regnen.
  39. ↑ Frei.
  40. ↑ Bettstatt.
  41. ↑ Zusammengebrochen.
Vun "https://als.wikipedia.org/w/index.php?title=Text:Michel_Buck/Bagenga/A_Trom&oldid=964151"