Text:Meinrad Lienert/Am Zürisee im Mai

Us der alemannische Wikipedia, der freie Dialäkt-Enzyklopedy

Am Zürisee im Mai, dichtet vum Meinrad Lienert (1865-1933), stammt us em Schwäbelpfyffli, sym erste Band mit Mundartgedicht.

Am Zürisee im Mai[Quälltäxt bearbeite]

Wou chamme öppis Schöiners gseh
As igänts Mai dr Zürisee
Mit syne grüene Hügle.
Tupfäbe isch dr See und blou.
Keis Jümpferli verstouht ’s äsou,
Sys Schöissli usezbügle.

Wie stönd im Bluest allsäme Bäum!
Beit nu, im Herbst sind s’ volle Chröim
Vo Pflume, Öpfle, Bire.
Äh, wüssti wou’s Lockpfyffli lyt!
Äs wachsi neimewou im Gstüüd.
Was cha ’s dän au? ’s tuet vüre.

Äs wie druf blous’ äs Sunntigschind,
Sä chämed d Häxli wie dr Wind
Us alle Stuudepösche.
Äs Schümli gäb’s im See im Schwick,
Und Wasserjümpferli allsdick,
Si gumped drus wie Frösche.

Ou wäni au das Pfyffli gfund!
Jetz wou a See dr Maie chunnt
Dur d Wybärg choge chranze.
I spilti ’s übere bloue See.
Und stiended Jumpfre uf wie Heu,
Mi allne wetti tanze.

Literatur[Quälltäxt bearbeite]

  • Meinrad Lienert: ’s Schwäbelpfyffli, Bd. I, Verlag Sauerländer & Co., Aarau 1920, S. 48.