Text:Dr Joggeli
Dr Joggeli isch es Schwiizer Värsli wo im 1908 in eme Bilderbuech vo de Lisa Wenger überlifert worde-n-isch. Es git glichi und ähnlichi Gedicht au in andere Sprooche. Bereits im 17. Johrhundert sind erschti Wurzlä vo dem Liäd z findä. Im Johr 1768 isch es scho imänä Buäch erschinä. Dä Text vo dem Liäd isch uf jüdischi Iwanderer zrugg z füärä.[1]
Text[Quälltäxt bearbeite]
Es schickt dr Buur dr Joggeli us, er söll go Birli schüttle.
Joggeli wott nid Birli schüttle,
d' Birli wänd nid falle.
Do schickt de Meischter s Hündli us, es söll de Joggeli bisse.
Hündli wott nid Joggeli bisse,
Joggeli wott nid Birli schüttle,
Birli wänd nid falle.
Do schickt de Meischter s Stäckli us, es söll go s Hündli haue.
Stäckli wott nid Hündli haue,
Hündli wott nid Joggeli bisse,
Joggeli wott nid Birli schüttle,
Birli wänd nid falle.
Do schickt de Meischter s Fürli us, es söll go s Stäckli brönne.
Fürli wott nid Stäckli brönne,
Stäckli wott nid Hündli haue,
Hündli wott nid Joggeli bisse,
Joggeli wott nid Birli schüttle,
Birli wänd nid falle.
Do schickt de Meischter s Wässerli us, es söll go s Fürli lösche.
Wässerli wott nid Fürli lösche,
Fürli wott nid Stäckli brönne,
Stäckli wott nid Hündli haue,
Hündli wott nid Joggeli bisse,
Joggeli wott nid Birli schüttle,
Birli wänd nid falle.
Do schickt de Meischter s Chälbli us, es söll go s Wässerli läpple.
Chälbli wott nid Wässerli läpple,
Wässerli wott nid Fürli lösche,
Fürli wott nid Stäckli brönne,
Stäckli wott nid Hündli haue,
Hündli wott nid Joggeli bisse,
Joggeli wott nid Birli schüttle,
Birli wänd nid falle.
Do schickt de Meischter de Metzger us, er söll go s Chälbli stäche.
Metzger wott nid Chälbli stäche,
Chälbli wott nid Wässerli läpple,
Wässerli wott nid Fürli lösche,
Fürli wott nid Stäckli brönne,
Stäckli wott nid Hündli haue,
Hündli wott nid Joggeli bisse,
Joggeli wott nid Birli schüttle,
Birli wänd nid falle.
Do goht de Meischter sälber us und foht a räsonniere.
Metzger wott jetz Chälbli stäche,
Chälbli wott jetz Wässerli läpple,
Wässerli wott jetz Fürli lösche,
Fürli wott jetz Stäckli brönne,
Stäckli wott jetz Hündli haue,
Hündli wott jetz Joggeli bisse,
Joggeli wott jetz Birli schüttle…
D'Birli wänd jetz falle!
Referanz[Quälltäxt bearbeite]
- ↑ http://books.google.de/books?id=TCcVAAAAQAAJ&pg=PA136&lpg=PA136&dq=schickt+de+bur+de+joggeli&source=bl&ots=M4Ht5EkGJB&sig=9IinKXdX5v8oFYdXBRZrlf2OBLk&hl=de&ei=EHDxTMzvB4_rOfi76aQK&sa=X&oi=book_result&ct=result&resnum=1&ved=0CBcQ6AEwAA#v=onepage&q=schickt%20de%20bur%20de%20joggeli&f=false