Text:D Wätterhäx va Jùu

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Die Gschicht isch vum Leo Buchs im Jouner Dialäkt ussem Januar 2012 nooch ere Gschicht vum Carl J. Luther, in „Jaun im Greyerzerland“.

D Wätterhäx va Jùu[Quälltäxt bearbeite]

Z Jùu ìm Duorf hät amaù a Häx gläbt, wa – grad asua wì sì hät wele – ds Wätter: der Sùneschyn, der Reen, der Lùft ù ds Gwìtter, gmacht hät. Em Pfaare hät das eppa gaar nìt gfalle ùn äär ìsch rietega chua, bìn era gäbege Gglägehìit das Kùnschtstǜkkì oo z probiere, fer as d Häx nahì ìm gònze Duorf uusglachìtì chùnt ù fer as ùf dä Wääg dì Puure nìt mia tǜ ùff sa lòse.

As ìsch bìm Hööwe gsy. As ìsch gànz schües Wätter gsy ùn as hät uusgsia, ases no dì lengschtì Zyt asua tietì blybe. Da hät der Pfaare gsìnet, ìtz sygì der Moment ùn ìsch ì ds Huus va der Häx ù hät begärrt ases chämì ga reene. D Häx ìsch sofort yverstàne gsy, em Pfaare das Kùnschtstǜkkì z zìege, wǜùs ja zierscht Maù gsy ìsch, as är zun era ìsch gònge. Sia hät gmìnt, das sygì grat a gäbìgì Glägehìit, de Pfaare by die Lüt aablìidega z mache ù as er de nò grad toù uusglacheta chunt. Sia hät em Pfaaren a Chela mit Wasser ggee ù häpmù gsìit, är mǜssì Kela söfù lòng uehì häbe, bìs as sia ùmhì ìnha chämì. Wen as Tröpfì Wasser uuskyt, dee chämes grad ga hagle. Nahì ìsch sì d Stäga uehì ùn obeny ggònge. Aber der Pfaare hät gaar nìt ìm Sìì khäbe, ùf das z lòse wa d Häx hät gsìit. Grad denn wan är d Häx ùmhì gküert hät, va òbenaha Sprǜchlenì uufsäge, hätter ds Wasser ùs der Chelen uusglüest ùn ìsch dervòò. Da hì sìch obedǜǜr a de Flüe bràndschwarz Woùche zämezòge ùn as ìsch nò nìt amaù a haùb Stùnd fǜǜr gsyy, häts as sǜütes fǜrchterlechs Hagùwätter ùber ds Duerf ù ds gònz Jùulendlì ggee, wa mù nò nie dervor ù dernòò gsia hät. Zù däre Zyt sida ùf dera gruosse Matten ùf em Schaafbärg, wa va zòberescht bìs zù de Schǜpfen aha chònt, a Huufe Chüe gsyy. Da si sì ùbertrìben arschlǜpft, si blìndlìngs dervoo gsprùnge ù si zäme mìt de Chüerebuebe ùber Pflüe ahì truolet. Zytdemm sida ùf em Schafbärg nùme nò Schaaf.

Wa dùù d Häx de Lütte va Jùu gònz gäär und dräckeg gsìit hät, dass dr Pfaare ds Hagùwätter gmacht hìigì, hät er ìm Duerf nüt mia zäge gkòò, ùn as ìsch nìt lòng gonge, wame na ìm Jùulendlì nüt mia gsia hät. Ds Gfeù va de Jùuner, wienegschtes Pmacht ùber ds Wätter z Jùu, das ìsch va da awäg gànz bì der Häx blìbe.

De Teggst aaloose?/i