Text:August Lustig/A. Lustig Sämtliche Werke: Band 1/Dr Neüjohrstag.

's isch sunderbar, ass d'Lit uf Erde
Nitt Alle viel, viel älter werde,
Un ass se sich als noch beklage,
Se miesste so viel Args ertrage,
Se wünsche sich doch am Neüjohr
Was schön un güet isch, alle Johr.

Entweder nutzt als 's Wünsche nit,
's isch möglig, oder wünsche d'Lit
Nur üs Intresse Glick un Heil
Un denke viellicht 's Gegetheil?
Das mag's o si, denn sàller Tag,
Do hat me Frind, mehr as me mag,
Me-n-isch in Alle lieb un güet,
Lit, wo me gar nitt kenne thüet,
Die wünsche-n-eim viel Glick un Freid,
Me-n-isch umringt mit Zàrtligkeit,
Me macht eim noch sogar Presànter,
Dr Facteur bringt eim si Kalànder,
Im Bierhüs, dert sin se nitt z'fül
Un stosse Pfiffe-n-eim ins Mül!
Do ka me sich als lang geh wehre,
Wenn Ein nitt raücht, so soll er's lehre!

Am Morge frieih im beste Schlof
Kunnt scho ne Orgelmann in Hof
Un macht e Duo mit em Hund;
Ass er eim nitt in d'Stuwe kunnt,
Isch alles! - We me 's Beste hätt,
So gàb me's 'm, nur ass er geht!

Küm isch dà üs em Hüs, so steht
O scho ne And'rer uf dr Schwelle!
Dà wird doch jetz nitt orgle welle?
Sunscht kännt si 's ganze Quartier freie!
Wenn die als vor de Biser dràihe,
So hebt me-n-als va witem scho
Si Nase züe un laüft dervo!
Doch nei, er hat si Orgle nitt,
Er will halt nur e Trinkgeld hit.

Dà hat eim no nitt recht verlo,
So steht dr Herr Dràckfüerme do,
Er hat si Spruch als no nitt üs,
Schmeckt's scho no Schnaps im ganze Hüs;
I wünsch' i, meint er noch derzüe,
Was ich mir sàlwer wünsche thüe!
Merçi, 's mien schone Sache si,
Me kännt si freie glaüb druf hi?

Küm isch dà dunte-n-uf dr Stross,
Klopft's wieder a, was isch denn los?
- I bi Dràckfüerme-n-in der Gasse,
- I wünsch' i Glick un ...
Thien Ihr' spasse?
Grad geht er jo zur Thüre-n-üse,
Dert sàhn 'r noch si blaüe Blüse!
- Dà isch jo nimm in dam Quartier,
- Ich bi's jo, wo-n-en remplacier,
- I wünsch' I...
Gehn zum Kückück Alle!
Wie thien I die Dràckfüerme g'falle?

No dàne kunnt vom Thurm dert owe
Dr Wàchter, un so geht's bis z'Owe;
Isch Einer Gätte noch derzüe,
So hat er, mein i, z'Nacht genüe,
Doch wird em g'wiss kei Glick meh' fehle,
Doch 's Geld, wo's her nàh un nitt stehle?...