Zur Metropolregion vo Sheffield ghööre d Stedt Rotherham, Doncaster und Barnsley. S Gebiet vo dr Stadt lit uf eme hüglige Bärgland, wo dr höggst Punkt von em 548 m hooch isch und dr niidrigst 29 m ASL. Fümf Flüss fliesse dur s Stadtgebiet, d Don, Sheaf, Rivelin, Loxley und Porter. Im Weste vo dr Stadt lit dr Peak-District-Nationalpark und die südlige Uslöifer vom Pennines-Gebirg. Es het in dr Stadt mee as 170 Wälder und 88 öffentligi Gärte und Parkaalaage und relativ zur Zaal vo de Iiwooner isch s die grüensti Stadt in Öiropa.
Sheffield isch lang bekannt gsi für sini Staalbrodukt. 1913 het dr Harry Brearley dr rostfrei Staal erfunde. Anderi wichdigi Industriizwiig si dr Choolebärgbau und d Stäibrüch gsi. In de 1970er Joor si vili Staalwärk zuedoo worde und Masse vo Arbäiter si arbetsloos worde. Hüte isch Sheffield e dienstläistigsorientierti Stadt.
