Serialisierung

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Serialisierig isch e Begriff us dr Informatik. Me verschtoht drunter e sequentielli Abbildig vo Objekt uf e externi Darschtelligsform. Zil isch, dass es Objekt persischtent wird.

E Objekt muess immer dann seriell dargschtellt wärde, we me s zuem Bischpil in e Datei schpichere will. Dört cha me Date numme hinterenander (sequentiell) abschpichere. E Objekt cha aber e Huffe Eigeschafte ha un Verwis uf dynamisch alloziierti Spicherberich, so dass me, würd me 's Objekt wie e Variabli eifach in d' Datei schribe, nümme die entschprächende Schpicheradrässe an de Schtelli vo dr Pointer seh würdi. Also müess me alli Date einzeln und nochenand (seriell) us denne Schpicherberich usehole un in e sequentielli Schtruktur bringe. Zuesätzlich bedütet des abr, dass dr Programmierer au drfür sorge muess, dass er drnoch bim Läse no weiss, wo wele Datensatz afangt un wo ner ufhört, will bi dynamisch alloziierte Spicherberich d' Grössi jo nit bschtimmt isch.

Es Ergebnis vo nere Serialisierig isch, dass des Objekt am End als Dateschtrom vorligt, wo denn witerverarbeitet wärde cha, zuem Bischpil in e Datei gschribe oder übers Netzwärk übertrage.

Noch de Serialisierig ligt e Objekt zweimol vor: als externi Darstellig (z.B. als Datei) un im Arbetsschpicher. Wird noch de Serialisierig e Änderig am Objekt im Arbetsschpicher vorgnoh het des kei Uswirkig uf des serialisierti Objekt in de externe Darschtellig.

Persischtenti Objekte chönne in de Regel widr in de Arbeitsschpicher zruckgschribe wärde. Sie unterscheide sich drnoch (bis uf de Zueschtand) nit vo andere Objekte.

S Wort Serialisierig wird au mänggmol fälschlich für e Sequentialisierung verwendet.