Sekundogenitur

Sekundogenitur bizaichnet e Nebelinie vonere Adelsfamili wo mee Recht as e gwöönlichi Nebelini hett. So cha e König e Soo oder Brüeder as Vasallekönig oder Prinz öber e bistimmts Piet iisetze. Wenn denn dem sini Noochome da Amt witterträäged, isches e Sekundogenitur. D Mitglider vo dere Nebelini stönd aber immer inere Abhängigkait vo de Stammlini.

E frües historisches Biispiil isch di hethitischi Königsfamili. Nochdem de Grosskönig Suppiluliuma I. um 1330 v. Chr. di syrischi Stadt Karkamis eroberet hett, hett er sin Soo Piyassili no zu sinene Lebzitte as Vizekönig öber die Stadt iigsetzt, Grooskönig isch aber de Arnuwanda I. wore, en andere Soo vonem. D Noochome vom Piyassili sind au witter Vizekönig vo Karkamis blibe, sind aber vo de Grooskönig us de Stammlini abhängig gsii. Nochdem s Hethiterriich um 1180 v. Chr. zämebrochen isch und di alt Stammlini verschwunde isch, hett de Kuzi-Tessub, Vizekönig vo Karkamis, de Titel Grosskönig öbernoo. De hett den ann vo sinene Söö as Landherr öber Malida iigsetzt und so en anderi Skundogenitur gschaffe. En andere Soo vonem isch Groosskönig vo Karkamis wore. Beed Lini hend länger nebenand existiert.