Dr schief Durm vo Pisa
Dr schief Durm vo Pisa (italienisch Torre pendente di Pisa) isch woorschinlig s bekanntiste schefe Bauwärk uf dr Wält und s Woorzäiche vo dr Stadt Pisa z Italie.
Gschicht
[ändere | Quälltäxt bearbeite]Dr Durm isch as e freistehende Gloggedurm (Campanile) für e Dom vo Pisa blant worde. Mä het dr Grundstäi am 9. August 1173 gläit, und 12 Joor spööter, wo mä bim dritte Stock aachoo isch, het sich dr Durm in Richdig Südoste afo näige. Druf het me 100 Joor lang nüm dra witergschafft. Die neggste vier Stöck het mä denn schreeg baut, um d Schieflaag uszgliiche. Mä het denn non emol e Pause gmacht, und d Gloggestube isch erst 1372 fertig worde.
Der Grund wiso dr Durm in d Schieflaag cho isch, isch ass er uf Leem und Sand baut worden isch und sich dä Undergrund under em Gwicht vom Durm het afo verforme. Hüte wäiss mä, ass er am Rand von ere ehemoolige Insle stoot, diräkt näben eme antike Haafebecki, wo scho lang versandet gsi isch.[1] Mä het e baar Mol brobiert, dr 55 Meter hoochi Durm z saniere, s letscht Mol in de 1990er Joor und het si Schieflaage vo fümfehalb Graad uf öbbe vier Grad chönne verchliinere.[2] Oobe het mä im Innere vom Durm in dr Middi e Pändel ufghänkt, wo unde bim Boode fast an dr Sitewand aachunnt.
Dr Legände nooch het dr Galileo Galilei, wo us Pisa gstammt het, füsikalischi Versüechen uf em Durm gmacht und drbi d Fallgsetz entdeckt.
Im Joor 1987 isch s Ansämbel us em Durm, dr Kathedrale nääbedraa, em Baptisterium und em Friidhoof vo dr UNESCO zum Wältkulturerb erklärt worde.
Weblingg
[ändere | Quälltäxt bearbeite]
Commons: Dr schief Durm vo Pisa – Sammlig vo Multimediadateie- Offizielli Website
- Technischi Informazione über e Durm
- UNESCO World Heritage List: Piazza del Duomo, Pisa (änglisch)
- Hanno Rauterberg: Ein Leuchtturm für Pisa (Artikel in dr Zeit 23/2001)
- Als vom Schiefen Turm von Pisa noch die Glocken läuteten
Fuessnoote
[ändere | Quälltäxt bearbeite]- ↑ Andreas Englisch: Das Geheimnis der Matrosen von Pisa (Artikel im Hamburger Abendblatt vom 16. Juni 2004)
- ↑ Der schiefste Turm der Welt In: sueddeutsche.de
|
Dä Artikel basiert uff ere fräie Übersetzig vum Artikel „Schiefer_Turm_von_Pisa“ vu de dütsche Wikipedia. E Liste vu de Autore un Versione isch do z finde. |
Koordinate: 43° 43′ 22,8″ N, 10° 23′ 46,7″ O