Süleymaniye-Moschee

Us der alemannische Wikipedia, der freie Dialäkt-Enzyklopedy
Dr dritt Stadthüügel mit dr Süleymaniye (rächts) und em Beyazıtdurm (linggs) über em Goldige Horn

D Süleymaniye-Moschee (türkisch Süleymaniye Camii) isch äini vo de groosse Moscheä z Istambul. Dr grooss Archidekt Sinan het s' im Ufdraag vom Sultan Süleyman em Brächtige zwüsche de Joor 1550 und 1557 baut und si isch äins vo sine wichdige Wärk. Die monumentali Külliye, wo d Moschee drzue ghöört, het en äänlige stedtebaulige und imperiale Aaspruch wie d Fatih-Moschee vom Mehmed em Erooberer. Dr Komplex nimmt die schwiirigi Topografii uf em stäile dritte Hüügel vo dr Stadt und d Stroosse zringsum as Uuseforderig aa und bietet originelli archidektonischi Löösige aa. Mäisterhaft si z. B. die dritti und vierti Medrese (râbi und sâlis medresesi), 1558/59 fertig baut, mit iire Terrassierige zum Goldige Horn aane. Im Inneree vo dr Moschee wird zum erste Mol s berüemte Bolus-Rot in de İznik-Blättli brucht. 130 farbigi Stäiglaasfänster mit wunderschööner Kalligrafii löön s Liecht dur d Kiblawand. Dr Innehoof wird wie in dr Üç-Şerefeli-Moschee z Edirne vo vier Minarett umfasst, die bäide, wo am nöggste bi dr Moschee si, si hööcher (81 Meter) as die bäide andere.

Weblingg[ändere | Quälltäxt bearbeite]

 Commons: Süleymaniye-Moschee – Sammlig vo Multimediadateie

Koordinate: 41° 0′ 58″ N, 28° 57′ 50″ O