S Südchinesische Meer

Us der alemannische Wikipedia, der freie Dialäkt-Enzyklopedy
Abgränzig vom Südchinesische Meer
D Insle im Südchinesische Meer

S Südchinesische Meer (chin. 南海, Nán Hǎi „Südmeer“, vietnamesisch Biển Đông, „Ostmeer“) isch e Däil vom Chinesische Meer und e Randmeer vom Pazifische Ozean in Asie. Dr Golf vo Tonkin isch e Däil von em.

Geografii[ändere | Quälltäxt bearbeite]

S Südchinesische Meer het e Flechi vo 3'685'000 km². Si middleri Diefi isch 1'060 Meter und sis Wasservolume 3'907'000 km³. Die grössti Diefi lit im China Sea Basin und isch 5'016 Meter.[1]

S Meer lit zwüsche China, dr Indochinesische und dr Malaiische Halbinsle und de Inslen Taiwan, Luzon, Palawan und Borneo. D Staate wo am Meer lige si d Volksrepublik China, d Republik China (Taiwan), d Philippine, Malaysia, Brunei, Indonesie und Vietnam.

S Südchinesische Meer wird im Nordoste dur Taiwan vom Ostchinesische Meer drennt, im Südoste dur die philippinischi Insle Palawan vo dr Sulusee, und isch im Oste über die 320 km bräite Luzonstrooss mit dr Philippinesee und im Süde über d Karimata-Strooss mit dr Javasee verbunde. Im Südweste isch d Strooss vo Malakka.

Die wichdigste Insle im Meer si:

  • Dongsha-Insle / Pratas-Insle: e Riff im Norde, wo witgehend undergangen isch under dr Kontrolle vo dr Republik China;
  • Hainan: die grösstu Insle im Norde, ghöört zur Volksrepublik China;
  • Zhongsha-Insle / Macclesfield Bank: e Riff, wo witgehend undergangen isch, östlig vo de Paracel-Insle, under dr Kontrolle vo dr Volksrepublik China;
  • Scarborough-Riff: e baar Felse im Oste, nit wit ewägg vo Luzon, under dr Kontrolle vo dr Volksrepublik China, vo de Philippine beaasprucht;
  • Paracel-Inseln: Atoll zwüsche Vietnam und Hainan, vo dr Volksrepublik China kontrolliert, vo Vietnam beaasprucht;
  • Spratly-Inseln: e Hufe chliini Inseli im Südoste, vo verschiidene Staate kontrolliert und beaasprucht;
  • Côn Đảo: im Südweste vor dr Küste, ghöört zu Vietnam;
  • Natuna-Insle und d Anambas-Insle: im Südweste, ghööre zu Indonesie.

Gebietsstrit[ändere | Quälltäxt bearbeite]

Wil s Meer für e Schiffvercheer vo Ostasie seer wichdig isch und au Energiikwelle im Meeresgrund vermuetet wärde, lige sich e Hufe vo de Staate zrings um s Meer in de Hoor, wäm die äinzelne Insle ghööre, und es git do und dört Zämmestööss wie im April 2012 bim Scarborough-Riff zwüsche philippinische und chinesische Schiff.

Fuessnoote[ändere | Quälltäxt bearbeite]

  1. Donald G. Groves und Lee M. Hunt: Ocean World Encyclopedia, McGraw Hill 1980. ISBN 0-07-025010-3. South China Sea (Site 356-358)

Weblingg[ändere | Quälltäxt bearbeite]

Koordinate: 12° N, 113° O

Dä Artikel basiert uff ere fräie Übersetzig vum Artikel „Südchinesisches_Meer“ vu de dütsche Wikipedia. E Liste vu de Autore un Versione isch do z finde.