Ruth Mönch

Dialäkt: Schwäbisch

D Ruth Mönch (* 8. Okdobr 1926 z Stuegert, wo-se am 19. November 2000 au gschdôrba ischt) ischt a deitscha Theater- ond Fernseh-Schauschbiilere, Heerschbiilschbrechere, Sengere ond Moderatorin gwäa. Zwoimôl en ihrem Leaba hôt-se gheiradet: En erschdr Ehe da Tenor Günter Steingräber ond s zwoide Môl da Willy Seiler. Vo sellem hôt-se au da Nôchnama ôôgnomma ghet, abr weiderhin Mönch als Kinschtlernama beibhalda.

Aus ihrem Leaba

D Ruth Mönch ischt am 8. Okdobr 1926 en Stuegert uff d Welt komma. Se ischt grad amôl 19 Jôhr alt gwäa, dô hôt-se beim Stuttgarter Lustspiel- und Operettentheater (wo’s scho lang nemme geit) a Engagement kriagt. Oina vo ihre Rolla isch d Titl-Figur en dr Operedde Schwarzwaldmädel gwäa, wo-se meh wia 100 Môl gschbiilt hôt. Schbäder isch d Ruth Mönch freia Mitarbeidere beim dômôlige Sender Süddeutscher Rundfunk en ihrer Hoimetstadt ond Südwestfunk z Bada-Bada (heit zammagfasst zom Sidweschtrundfunk) wôrra. Ama greeßra Personakreis ischt-se bekannt wôrra durch dia Radio-Sendonga Südfunklotterie, Frühschoppen, Musik auf dem Laufsteg, Volksmusik-Hitparade ond Sie wünschen, wir spielen. Mitgwirkt hôt-se au en mehrere Heerschbiil em schwäbischa Dialekt.

Em Jôhr 1969 schliaßlich isch d Ruth Mönch – zamma mit ihrem Môô Willy Seiler – vom Saarlendischa Rundfunk fir deam sei Fernsehsendong Im Krug zum grünen Kranze engagiert wôrra, wo em Lauf dr Zeit ibr 500-môl ibr da Bildschirm ganga ischt. Sella Sendong ischt gewissermaßa dr Vorlaifer vom schbätra Musikantenstadl gwäa. Au en dr Fernseh-Serie Deutschland, deine Schwaben nôch-em gleichnamiga Buach vom Thaddäus Troll hôt-se a baar Rolla kriagt.

Nôch dr Funkzioo als Moderatorin hôt d Ruth Mönch bloß noh als Schauschbiilere gschafft. So ischt-se zom Beischbiil bis kurz vôr ihrem Ableaba uff dr Bihne vom Volkstheader Komede Scheuer en dr Mäulesmühle em Siibamihladal bei Leifelda-Echderdenga gschdanda, wo-se mit selle schwäbische Komiker Albin Braig ond Karlheinz Hartmann Erfolge gfeiret hôt. A baar vo de Theadr-Stickla send vom Sidweschtrundfunk uffzoichnet wôrra.

Am 19. November 2000 hôt d Ruth Mönch en ihrer Hoimetstadt d Auga fir emmer gschlossa. 74 Jôhr alt ischt-se wôrra. Ihr ledschda Ruha hôt-se uff-em Stuegerter Pragfriidhof gfonda, em gleicha Grab wia ihr Môô.

A Auswahl vo de Film, wo-se dren mitgschbiilt hôt

• Tatort: Kennwort Fähre (1972)
• Tatort: Eine Million Mäuse (1987)

A Auswahl vo de Liader, wo uff Schallpladda rauskomma send

• Immer nur Schatz und Schätzle
• Schwabenland Polka
• Sie wünschen – wir spielen
• Was soll i bloß heut wieder koche
• Der Zipperle Tanz
• Vögele im Tannenwald
• Wo a grüner Besa winkt
• ... und am Montag, da ist Blautag
• ... schüttets über mi na
• En d'r guate alte Zeit

Weblink

• Ruth Mönch in de Internet Movie Database (änglisch)
• Nachruf en dr Pressemabb vom SWR mit-ma Haufa Ôgaba zo ihrem Leaba
• Dr Willy Seiler ond sei Frau Ruth Mönch bei youtube mit-em Liadle Schaffe, schaffe, Häusle baue
• S Gemeinschaftsgrab vom Willy Seiler ond seira Frau uff-em Stuegerter Pragfriedhof

Dä Artikel basiert uff ere fräie Übersetzig vu dere Version vum Artikel „Ruth_Mönch“ vu de dütsche Wikipedia. E Liste vu de Autore un Versione isch do z finde.