Rugby

Us der alemannische Wikipedia, der freie Dialäkt-Enzyklopedy
Hops zue: Navigation, Suech
E Spiiler wiicht eme Tackling us
Rugby-Bundesliga: Tackling
E Rugby-Gool mit zwäi sänkrächten Stange und ere Kwerstange

Rugby (ängl. au Rugby Football) isch e Familie vo Sportarte, wo zämme mit em Schutte z Ängland entstande si. American Football und Canadian Football si spööter us em Rugby entstande. D Wariante, wo am witiste verbräitet si, si Rugby Union und Rugby League. In dr letschte Zit goot dr Trend in Richdig Rugby Union.

D Grundlaage vom Spiil[ändere | Quälltäxt bearbeite]

Bi allne Rugby-Wariante verwändet mä e Balle in dr Form vom ene verlängerete Rotazioonsellipsoid. S Ziil isch s, d Balle über em Gegner si Goollinie z dräge oder z schutte und eso Pünkt z mache. Das cha uf verschidnigi Arte bassier:

  • Versuech (ängl. try): E try bechunnt mä, wenn d Balle im Molfäld vom Gegner uf e Boode cha legge.
  • Erhööchig (ängl. conversion): Noch eme try daf die aagrifendi Mannschaft d Balle vo irgend eme Punkt uf ere dänkte Linie parallel zur Siteuslinie dur e Punkt, wo d Balle bim try uf e Boode gläit worde isch, uf s Gool schutte und wenn si über dr Kwerstange zwüsche de bäide sänkrächte Stange duurefliegt, isch d conversion perfekt.
  • Sprungdritt (ängl. dropkick): E Spiiler schuttet d Balle, wo vorhär dr Boode berüert het, us em laufende Spiil uuse über d Kwerstange zwüsche de bäide Goolstange.
  • Stroofdritt (ängl. penalty kick): E Benalty über d Latte vom Gool vom ene Punkt us, wo die gegnerischi Mannschaft e schlimms Faul gmacht het.

Vo Hand daf mä d Balle nume hinderzig wärfe oder abgee. Wenn d Balle aber vorwärts gheit wird, findet e Gedräng (ängl. scrum) statt. Acht Spiiler vo de bäide Mannschafte brobiere d Gegner vo dr Balle, wo zmizt in scrum iine grollt wird, äwäg z schupfe und eso d Balle z eroobere.

D Balle daf in alli Richdige gschuttet wärde. Nume e Spiiler, wo d Balle in de Händ het, daf aagriffe wärde. Mä daf en festheebe und aabedrucke (ängl. tackle) aber nume vo de Aggsle abwärts und chann en au umgheie. Wenn e Spiiler d Balle hebt und mit mee as sine Fuesssoole dr Boode berüert, muess er d Balle sofort lo gheie und daf sä nüm uflääse. Wenn er das nid machtm bechunnt dr Gegner d Balle. Wenn dr Spiiler uf em Boode lit, döfe anderi Spiiler vo bäide Mannschafte um d Balle schupfe, aber ooni Händ. Schloo und Högglistelle si bim tackling verbote.

D Spiiler häi Liibli aa, churzi Hose, Chnöistrümpf und Schuttschue. Im Muul müesse alli e Zaanschutz haa. Herti Schutzchläider si nit erlaubt, aber e dünni, wäichi Chappe oder e dünns Bolster uf de Aggsle scho.

S Gool bestoot us zwäi sänkrächte Goolstange, mit eme Abstand vo 5–6 m und ere Kwerstange in 3 m Hööchi. Si stöön in dr Middi vo dr Goollinie. Unde an de Goolstangen het s Schutzbolster, so dass sich d Spiiler nid verletze.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vum Artikel „Rugby“ vu de dütsche Wikipedia.

E Liste vu de Autore un Versione isch do z finde.