S Schiff Resolution vom James Cook

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Resolution
Resolution.jpg
p1
Schiffsdaate
Faane GroßbritannienKönigreich Großbritannien (Seekriegsflagge) Großbritannie
anderi Schiffsnääme
  • Marquis of Granby
  • Drake
Schiffstyp Forschigsschiff
Stapellauf 1771
Was mit em bassiert isch unklar
Määss und Bsatzig
Lengi
33,7 m (Lüa)
28,5 m (Lpp)
Bräiti 9,3 m
Diefgang max. 3,99 m
 
Besatzig 112 Maa
Takelig und Rigg
Takelig Bark
Zaal vo de Mäst 3
Bewaffnig
  • 12 × 6-Pfünder Kanone
  • 12 × ½-Pfünder Dräibasse
D Resolution und d Adventure in dr Matavai Bay

D Resolution isch s Schiff gsi, wo dr James Cook uf sinere zwäite und dritte Forschigsräis brucht het.

Wo d Naby s kauft het, isch s Schiff 14 Möönet alt gsi, d Bark Marquis of Granby, 462 tons Fassigsvermööge, 34 m lang, fast 11 m bräit und mit 4 m Diefgang, e Chooleschiff us Whitby, wie scho im Cook sini allererste Schiff und spööter au d Endeavour, won er mit ere die ersti Pazifikräis gmacht het. Es het 4'151 Pfund kostet, dr Usbau no witeri 6'565. Dr Cook het uf bäide Räise 112 Maa an Bord ghaa.

Dr Joseph Banks, wo as Naturforscher bim Cook siner erste Forschigsräis drbii gsi isch, het wider welle mitseegle und het s Schiff lo usbaue. Wil aber d Seedüchtikäit bin ere Broobefaart schlächt gsi isch, het mä d Verändrige rückgängig gmacht. Das het dr Banks verergeret und zwäi Möönet vor dr Abräis het er abgsäit.

D Marquis of Granby isch zwäimol umdauft worde: Zerst uf e Naame Drake, und e Moonet spööter het mä sich überläit, ass d Spanier in däm Naame chönnte e Browokazioon gsee und Brobleem mache, und mä het im Schiff Resolution (Entschlossehäit) gsäit.

Dr Cook isch am 13. Juli 1772 vo Plymouth us zämme mit em Begläitschiff Adventure in See gstoche und isch 3 Joor, 18 Dääg und öbbe 300'000 Kilometer spööter am 30. Juli 1775 uf Ängland zruggchoo.

E Joor spööter isch dr Cook zu sinere letschte Räis ufbroche, und isch 1779 uf Hawaiʻi umbrocht worde. Dr Lütnant Charles Clerke, wo vorhär d HMS Discovery, s Begläitschiff uf dr dritte Faart kommandiert het, het denn d Läitig vo dr Expedizion und s Kommando über d Resolution übernoo. Er isch aber unterwägs gstorbe. Noch iim isch dr Lütnant John Gore Kommandant worde. Dr braktisch Füerer vom Schiff wäärend dr Räis noch em Dood vom Cook isch aber dr Navigator William Bligh, wo spööter as Kommandant vo dr Bounty bekannt worde isch.

In de Joor druf isch d Resolution as Dransporter uf dr Ost-Indie-Rute underwägs gsi, wo si am 9. Juni 1782 vom franzöösische Admiral de Suffren erbütet worde isch. Vo denn aa wirds schwiirig z wüsse, was mit em Schiff bassiert isch.[1] Es isch aber überliiferet, ass dr britisch Konsul em hawaiische Köönig David Kalākaua wäärend sinere Wältr#is 1881 im Haafe vo Alexandria e Schiff as im Cook si Resolution zäigt het.[2]

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. vgl. The Resolution
  2. William N Armstrong: Around the world with a king. New York 1904, S. 193f., 196