Räbluus

D Räbluus (latynisch: Daktulosphaira vitifoliae und Viteus vitifoliae) isch es Dier us dr biologische Familie vo de Zwärglüüs. Si isch e grosse Schädling für e Wyybou.

d Entwicklig vo dr Räbluus

Die Lüüs sind öppe ein Millimeter gross. D Räbluusflöige legge d Eier a d Rinde vom Räbstock. D Dier, wo do druss schlüüfe, legge iri Eier deils a d Bletter; anderi wandere zu de Wurzle im Bode, wo si sech vermehre; und wenn dr Winter vrby isch, frässe si die junge Wurzle und d Wiibli bringe wider Eier a d Rinde ufe. Wil d Wurzle nümme funkzioniere, stirbt d Pflanzen ab.

D Räbluus chunt us Nordamerika. Si isch i de 1860er Joore uf Europa cho, wo si zerscht z Frankrych riisegi Gebiet, nämlech öppe zwöiehalb Millioone Hektare vo Rääbe ganz kabut gmacht het. Au z Dütschland, i dr Schwiiz und z Öschtrych het d Räbluus als «Neozoe» i de Wyygebiet schlimm gwüetet.

Literatur

• Victor Fatio: Die Phylloxera (Reblaus). Kurzgefaßte Anweisungen zum Gebrauche für die kantonalen und eidgenössischen Experten in der Schweiz. Ins Deutsche übertragen von H. Krämer. 2. Auflage. Aarau 1879.
• Hanns-Heinz Kassemeyer, Günter Schruft: Krankheiten und Schädlinge der Weinrebe. Th. Mann, Gelsenkirchen 1999, ISBN 3-7862-0112-9.

Weblink

 Commons: Reblaus (Daktulosphaira vitifoliae) – Sammlig vo Multimediadateie

• champagner.com – Reblaus (Phylloxera)