Ramon Pichot i Gironès

Pichot, vom Ramon Casas (MNAC).

Calle de Santa María.

Dr Ramón Pichot i Gironès (* 1871 z Barcelona, † 1. Merz 1925 z Bariis) isch e katalonische Mooler gsi. Er het zur Colla del Safrà-Grubbe ghöört zämme mit em Isidre Nonell, em Joaquim Mir, Ricard Canals, Juli Vallmitjana und em Adrià Gual. Er isch no jung gsi won er uf Frankriich gangen isch. Dört het er 1901 s bekannte Künstlermodäll Germaine Pichot ghürootet. Zämme häi si e Restorant gfüert in dr Nööchi vom Bateau Lavoir, wo La maison rose ghäisse het.

Dr Pichot isch e Fründ vom Salvador Dalí, Pablo Picasso und vom Santiago Rusiñol gsi. Noch em Erste Wältchrieg het er Bariis verloo, isch aber immer wider uf Bsuech choo. Bi äim vo dene Bsüech isch er blötzlig gstorbe, was dr Picasso eso erschütteret het, ass er d Figuur vom Pichot ins Bild vo de Drei Dänzere ufgnoo het, won er zu deere Zit dra gmoolt het.

Dr Stil vom Pichot isch aafänglig vo de Impressioniste beiiflusst gsi, spööter het er zur symbolische Modärne ghöört.

Im Pichot si Schwöster, d María Gay, isch e wichdigi Operesängere gsi.

Illustratione

• Santiago Rusiñol: Fulls de la Vida, illustriert von Ramon Pichot i Gironès, 1898

Weblink

•  Commons: Ramon Pichot i Gironès – Sammlig vo Multimediadateie
• Ramon Pichot i Gironès i dr Gran Enciclopèdia Catalana (katalanisch)
• Ramon Pichot i Gironès uf artnet.com